ئاڤا بەدواداچوون بۆ کێشەی هەژمارنەکردنی خزمەتی سەربازی فەرمانبەران دەکات

ئاڤا نیوز

ئەو فەرمانبەرانەی خانەنشین دەکرێن و خزمەتی سەربازییان هەیە، داوا دەکەن خزمەتەکەیان بۆ هەژمار بکرێت، بەڕێوەبەرایەتی گشتیی خانەنشینی هەرێمی کوردستان لەمبارەیەوە دەڵێت 'دەبێت ڕێنماییمان لە بەغداوە بۆ بێت، بۆ ئەوەی خزمەتی سەربازی هەژمار بکەین'.

چیرۆکی سەرەکی: ئەو فەرمانبەرە خانەنشینکراوانەی خزمەتی سەربازییان هەیە، وەک خۆیان دەڵێن بەشێکیان ساڵانی خزمەتیان ناگاتە 25 ساڵ، بەڵام خزمەتی سەربازییان هەیە، بۆ هەژمارکردنی ئەم خزمەتەش سەردانی بەڕێوەبەرایەتی خانەنشینییان کردووە، پێیان وتراوە بۆیان هەژمار ناکرێت و کار بە بڕیاری هەژمارکردنی خانەنشینی سەربازی ناکەن، لە کاتێکدا خزمەتی سەربازی بۆ فەرمانبەرانی شارەکانی ناوەڕاست و خوارووی عێراق هەژمار دەکرێت.

زانیاریی بەدەستهاتوو: سەرچاوەیەکی باڵا لە بەڕێوەبەرایەتی گشتیی خانەنشینی هەرێمی کوردستان، بە ئاڤا میدیای ڕاگەیاند: سەردەمی دوو ئیدارەیی لە سنووری سلێمانی خزمەتی سەربازی هەژمار دەکرا، بەڵام دوای یەکگرتنەوەی هەردوو ئیدارەکە لە 2005 بە نووسراوێکی فەرمی وەزارەتی دارایی و ئابووری هەژمارکردنی خزمەتی سەربازی ڕاگیرا.

سەرچاوەکەی بەڕێوەبەرایەتی گشتیی خانەنشینی گوتیشی: لە ساڵی 2018 نووسراوی ئەنجوومەنی وەزیرانمان بۆ هات، بە گوێرەی نووسراوەکە ئەو کەسانەی خانەنشینی سەربازییان بۆ هەژمار کراوە و پارەی تەوقیفاتیان نەداوە دەبێت هەژمارکردنەکەیان ڕابگیرێت، بۆیە لەو کاتەوە خزمەتی سەربازی ڕاگیراوە و هەژمار نەکراوە.

ئەوەی پێویستە بیزانیت: بەغدا هێشتا ڕێنمایی بۆ بەڕێوەبەرایەتی گشتیی خانەنشینی هەرێمی کوردستان نەناردووە، تا خزمەتی سەربازی هەژمار بکات، بە وتەی سەرچاوەکەی خانەنشینی هەرێم 'ئەگەر بەغدا ڕێنمایی بنێرێت، ئەوا ڕێنماییەکە جێبەجێ دەکەن و خزمەتی سەربازی بۆ خانەنشینان هەژمار دەکەن'.