لێدوانێکی بەڕێوەبەری فڕۆکەخانەی بەغدا بابەتی گەرمی سۆشیال میدیایە

ئاڤا نیوز

کۆمپانیای بەڕێوەبردنی فڕۆکەخانەکان لە عێراق دەڵێت، هەرچەندە نۆژەنکردنەوەی فڕۆکەخانەی بەغدا گرفت و بێزاریی بۆ گەشتیاران دروستدەکات، بەڵام گەشتەکان بەشێوەیەکی ئاسایی بەردەوام دەبن، چونکە بەغدا هیچ فڕۆکەخانەیەکی جێگرەوەی نییە.

چیرۆکی سەرەکی: لە فڕۆکەخانەی بەغدا لەپاڵ خراپی بەشێک لە ڕێگاوبانەکان و پچڕانی کارەبا و هەندێکجار ناڕێکی کاتی گەشتەکان و زۆر کێشەی دیکە، بەڵام بەڕێوەبەری فڕۆکەخانەکە لە نوێترین چاوپێکەوتنیدا بازی بەسەر ئەو کێشانەدا داوە و دەڵێت، باشترین شوێنی دەستشۆر (WC)ـیان لەناو فڕۆکەخانەی بەغدا بوونیادناوە.

لێدوانی فەرمی: بەڕێوەبەری فرۆکەخانەی بەغدا لە چاوپێکەوتنێکی ڕۆژنامەوانی دەڵێت، فڕۆکەخانەی بەغدا ئێستا یەکەمی جیهانە (WC)ـیەکانمان نۆژەن کردووەتەوە. سەبارەت بە هۆڵەکانی چاوەڕوانیش پرسیاری لێ دەکرێت، لە وەڵامدا دەڵێت،وا خەریکی ئەوانیشین.

کاردانەوەکان: ئەم لێدوانەی بەڕێوەبەری فڕۆکەخانەی بەغدا، کاردانەوەی سەیری بەدوای خۆیدا هێنا و بووە بابەتی سۆشیاڵ میدیا، وەکو گاڵتەجاڕییەک دەڵێن، ئەی بۆ باسی ئەوە ناکات، ڕۆژ نیە گەشتی فرۆکە دوا نەکەوێت، جانتای خەڵک بەهەڵە نەنێردرێ بۆ وڵاتانی و دیکەو  چەندین کێشەی دیکە.

ڕاگەیێنراوی فەرمی: کۆمپانیای گشتی بەڕێوەبردنی فڕۆکەخانەکان لە عێراق لە ڕوونکردنەوەیەکدا ئاماژەی بەوەکردووە، قۆناغەکانی نۆژەنکردنەوە و بەهێزکردنی ژێرخان لە فڕۆکەخانەی نێودەوڵەتی بەغدا بەردەوامن، ئەوەش بە ئامانجی باشترکردنی ئەزموونی گەشتکردن و ڕەخساندنی ژینگەیەکی ئاسان و ئارام بۆ هەموو گەشتیاران.

بەشێکی دیکە لە خاڵەکانی ڕوونکردنەوەکە:

- پێداگرین لەسەر ئەوەی نۆژەنکردنەوەکە، کاریگەریی لەسەر جوڵەی گەشتیاران نەبێت و کاریش بۆ باشترکردنی خزمەتگوزارییەکان دەکەین.

- بەهۆی نەبوونی فڕۆکەخانەی جێگرەوە لە بەغدا، ڕەنگە پرۆسەکە بێزاری بۆ گەشتیاران دروستکردبێت، بەڵام ئەم نۆژەنکردنەوەیەش ڕێکارێکی پێویستە بۆ داهاتوویەکی باشتر.

- هیوادارین گەشتیاران لە گرنگی ئەم پرۆسەیە تێبگەن کە بۆ بەرژەوەندی ئەوانە و دوای کۆتاییهاتنیشی، فڕۆکەخانەکە بەجۆرێک دەبێت کە لە ئاستی بەغدای پایتەختدا دەبێت.