کامێراکانی هاتووچۆ سەرپێچی بەکارهێنانی موبایل و نەبەستنی پشتێنی سەلامەتی تۆمار دەکەن؟

ئاڤا نیوز

 

لە بەشێکی زۆری شەقام و ترافیک لایتەکان، کامێراکانی هاتووچۆ بۆ تۆمارکردنی سەرپێچییەکان کەوتوونەتە کار و هاتووچۆی هەولێر شێوازی تۆمارکردنی سەرپێچییەکان بۆ ئاڤا میدیا ئاشکرا دەکات. 

 

وینە گەورەکە: لە پاڵ پاڵاوگە نایاسایی و کارگەکاندا، ئۆتۆمبێلەکان کاریگەریی ڕاستەوخۆیان لەسەر پیسبوونی ژینگە هەیە، دوای بڕیارەکانی سەرۆکوەزیران مەسرور بارزانی بۆ پاراستننی ژینگە، لایەنە پەیوەندیدارەکان ڕێوشوێنی پێویستیان بۆ ڕێگریکردن لەو هۆکارانەی دەبنە هۆی پیسبوونی ژینگە و سزادانی سەرپێچیکاران گرتووەتەبەر.

 

لێدوانی فەرمی: عەقید هێمن ئەمین، وتەبێژی هاتووچۆی هەولێر بە ئاڤا میدیای ڕاگەیاند: بەهۆی دانانی کامێراکانی هاتووچۆوە لە شوێنە جیاوازەکان، ڕووداوەکان بەشێوەیەکی بەرچاو کەمیان کردووە، لە ئێستاشدا کامێراکان بەکارهێنانی موبایل و نەبەستنی پشتینی سەلامەتی تۆمار ناکەن.

 

ئەوەی پێویستە بیزانیت: ئەو کامێرایانەی لە ترافیک لایتەکان دانراون، چوار سەرپێچی تۆمار دەکەن: 

-نەوەستان لە چرای سووری ترافیکەکان.

-تێپەڕاندنی هێڵی تایبەت بە پەڕێنەوەی پیادە لەلایەن ئۆتۆمبێلەکانەوە.

- تیژرۆیی لەکاتی دەرچوون لە ترافیک لایتەکاندا.

-وەستانی ئۆتۆمبێلەکان لە ڕێڕەوی دەستی ڕاست، لەو شوێنانەی تایبەتە بە پێچکردنەوە یان سووڕانەوەی ئۆتۆمبێلەکانی دیکە.

 

لەلایەکی دیکەوە: هاتووچۆی هەولێر چاودێری ئەو ئۆتۆمبێلانە دەکات کە دوکەڵی زیانبەخشیان هەیە و ژینگە پیس دەکەن، تەنانەت هەندێکجار دەبنە بەربەستی بینین بۆ شۆفێران، بەمەش دەستیان بەسەردا دەگیرێت و ناچار دەکرێن بە چاککردنەوەی ئۆتۆمبێلەکانیان، بەپێی ڕێنماییەکانی هاتووچۆش سزا دەدرێن.

 

بۆچی گرنگە: کامێراکان کاریگەریی تەواویان لەسەر کەمکردنەوەی ڕووداوەکانی هاتووچۆ هەیە، بەمەش هاونیشتمانیان لە زیانە گیانی و ماددیییەکان دەپارێزێت.