تا ئێستا 74 پاڵاوگەی نایاسایی لە هەولێر و دهۆک داخراون

ئاڤا نیوز

 

سەرۆكی دەستەی ژینگەی هەرێمی كوردستان ڕایدەگەیەنێت، تا ئێستا 74 پاڵاوگە لە هەولێر و دهۆک داخراون و پلان هەیە تاكۆتایی ئەمساڵ هیچ پاڵاوگەیەكی نایاسایی نەمێنێت.

 

وێنە گەورەكە: بەهۆی زیادبوونی ڕێژەی پیسبوونی هەوای شارەكان بەهۆی هەبوونی پاڵاوگەی نایاسایی، سەرۆكوەزیران مەسرور بارزانی، لە ڕۆژی 12-1-2025 کۆبوونەوەی فراوانی لەگەڵ بەرپرسانی کارگێڕی هەولێر و دهۆک ئەنجامدا، لە کۆبوونەوەکە چوار بڕیاردران، یەکێک لە بڕیارەکان پەیوەست بوو بە پاڵاوگەکان، هەر پاڵاوگەیەک یان کارگەیەک لە دەرەوەی مەرج و ڕێنماییەکان کار بکات و ببێتە هۆی پیسبوونی ژینگە، ڕێکاریی یاسایی بەرامبەر دەگیرێتەبەر و دادەخرێت.

 

لێدوانی فەرمی: عەبدولرەحمان سدیق، سەرۆكی دەستەی ژینگەی هەرێمی كوردستان ڕایگەیاند، تا ئێستا 59 پاڵاوگە لە هەولێر و 15 لە دهۆک داخراون و پرۆسەی داخستنیان بەردەوام دەبێت.

 

زانیاریی تایبەت: سەرۆکی دەستەی ژینگەی هەرێمی کوردستان ئاشكرای دەكات، پلانەكە وایە لە کۆتایی هیچ پاڵاوگەیەكی نایاسایی نەمێنێت و لە هەموو کوردستان تەنیا سێ پاڵاوگە هەبن کە بە پێی مەرجە ژینگەیی و ستانداردا کاربکەن.