وەزارەتی ناوخۆ: پەکەکە دەیەوێت خۆپیشاندانەکانی سلێمانی بقۆزێتەوە

ئاڤا نیوز

وەزارەتی ناوخۆی حکومەتی هەرێمی کوردستان، لەبارەی گردبوونەوەی فەرمانبەران لە پارێزگای سلێمانی ڕایگەیاند، کۆمەڵێک کەس و لایەنی دەرەکی و ناوخۆیی لە عێراق دەیانەوێت ئەم داواکارییانە بە کاربهێنن.

وێنە گەورەکە: کۆمەڵێک مامۆستا و فەرمانبەر ئەمڕۆ یەکشەممە ویستیان خۆپیشاندان و گردبوونەوەکانیان لە سلێمانیەوە بهێنن بۆ هەولێر، بەڵام پارێزگاری هەولێر ڕایگەیاند، ئەو مامۆستایانە مۆڵەتیان وەرنەگرتووە.

ڕاگەیێنراوی فەرمی: وەزارەتی ناوخۆی حکومەتی هەرێمی کوردستان لە ڕاگەیێنراوێکدا دەڵێت: چەند رۆژێکە لە سنووری سلێمانی گردبوونەوەی ژمارەیەک فەرمانبەر بەدی دەکرێت. داواکارییە ڕەواکانی فەرمانبەران و چین و توێژەکانی هەرێمی کوردستان هەمیشە لە خشتەی کارە لەپێشینەکانی حکوومەتی هەرێمی کوردستان بووە.

لە بەشێکی دیکەی ڕاگەیێنراوەکەی وەزارەتی ناوخۆ هاتووە :

-    کۆمەڵێک کەس و لایەنی دەرەکی و ناوخۆیی لە عێراق دەیانەوێت ئەم داواکارییانە بە کاربهێنن بۆ مەبەستی گوماناویی خۆیان و هەندێک لایەنی پاشکۆ، لایەنەکانی لە یاسا دەرچوو ، پەکەکە و کەسانی تر سوود لەو دەرفەتە وەردەگرن.

-   نیازیان هەیە بۆ شێواندنی ئاسایشی ناوچەکانی تری هەرێم بەکاری بهێنن و بەمەش داواکارییە ڕەواکانی فەرمانبەران تێکەڵ بە مەرامەکانیان دەکەن.

-    سەرباری ڕێزگرتن لە مافی خۆپیشاندان، هەر هەوڵێک بۆ تێکدانی ئاسایشی هەرێمی کوردستان ڕێگرییان لێدەکرێت و هەر هەوڵێک بەدەر لە یاسا و ڕێنماییەکان بێت ڕێگەی پێنادرێت.