بەهۆی ڕۆچوونی زەوی لە چین دەیان کەس بێسەرووشوێنن

ئاڤا نیوز

بەهۆی ڕۆچوونی زەوییەوە لە چین کەسێک گیانی لەدەستداوە و بە دەیان کەسی دیکەش تاوەکو ئێستا بێسەرووشوێنن.

چیرۆکی سەرەکی: میدیاکانی چین بڵاویانکردەوە، بەهۆی ڕۆچوونی زەوی لە پارێزگای سیچوان لە باشووری ڕۆژئاوای چین کەسێک گیانی لەدەستداوە و دوو کەسیش برینداربوون، بە دەیان کەسیش تاوەکو ئێستا لە ژێر خۆڵ و پەردووی ڕۆچوونەکە ماونەتەوە.

لێدوانی فەرمی: دەسەڵاتدارانی چین دەڵێن، ڕۆچوونی زەوییەکە دوای چەند ڕۆژێک لە بارانی بەخوڕ ڕوویداوە، لە ئێستادا فریاگوزارانی پارێزگای سیچوان خەریکی دۆزینەوەی بە لایەنی کەم 28 کەسن، کە لە دوای ڕوودانی ڕۆچوونی زەوییەوە بێسەروشوێن بوون.

زانیاریی زیاتر: نزیکەی 10 خانوو کەوتوونەتە ژێر خۆڵ و چەند کەسێک لە ژێر خاک و پاشماوەدا گیریان خواردووە. دوو کەس بە برینداری ڕزگارکراون و 200 کەسی دیکەش گواستراونەتەوە بۆ پەناگەیەکی سەلامەت.

کاریگەری و لێکەوتەکان: شی جینپینگ، سەرۆکی چین داوای هەوڵەکانی گەڕان و ڕزگارکردنی "تەواوی" کردووە، جەختی لەسەر مامەڵەکردنی ورد لەگەڵ پاشهاتەکانی کارەساتەکە کردووەتەوە بۆ ڕێگریکردن لە کارەساتی لاوەکی.