هۆشیار زێباری: مانگرتنەکەی سلێمانی بە سیاسیی کراوە و باشتربوو ببرێتە بەغدا

ئاڤا نیوز

ئەندامێکی دەستەی کارگێڕیی مەکتەبی سیاسیی پارتی دەڵێت، مانگرتنی مامۆستا و فەرمانبەرانی ناڕازیی لە سلێمانی بە "سیاسیی" کراوە و باشتربوو ئەوان خێمەی مانگرتنەکەیان بۆ بەغدا بگوازنەوە و داوای شایستە داراییەکانیان لە حکومەتی فیدڕاڵ بکەن.

وێنە گەورەکە: لە 28ـی مانگی ڕابردووەوە مانگرتنی بەشێک لە مامۆستایان و فەرمانبەرانی سلێمانی دەستیپێکردووە و تائێستاش بەردەوامە، داواکاری سەرەکیی مانگرتووانییش پێدانی مووچەیە لەکاتی خۆیی و گەڕانەوەی پلەبەرزکردنەوەی فەرمانبەرانە کە نۆ ساڵە ڕاگیراوە.

پەیامی فەرمی: هۆشیار زێباری، ئەندامی دەستەی کارگێڕیی مەکتەبی سیاسیی پارتی لە هەژماری تایبەتی خۆی لە تۆڕی کۆمەڵایەتی ئێکس ئاماژەی بەوەكردووە، "ئەو مانگرتنەی بەم دواییە لە سلێمانی ڕێکخراوە، بە سیاسی کراوە و باشتربوو برایانی مانگرتوو خێمەی مانگرتن و خۆگرتنەوە لە خواردن و خواردنەوە، بۆ گۆڕەپانی تەحریر یان شەقامی ئیمام قاسم لەبەردەم وەزارەتی دارایی بگوازنەوە، لەوێوە داوای شایستە داراییەکانیان بەشێوەیەکی ڕێکخراو بکەن، بەتایبەتیش کە حکومەتی هەرێم ئەم بابەتەی لەگەڵ بەغدا یەکلاییکردووەتەوە."