وڵاتانی عەرەبی لەبارەی کۆچی زۆرەملێی فەلەستینییەکان کۆدەبنەوە

ئاڤا نیوز

 

کۆتایی ئەم مانگە میسر میوانداری کۆبوونەوەی نائاسایی لوتکەی عەرەبی دەکات بە ئامانجی ڕووبەڕووبوونەوەی هەوڵەکان بۆ بەزۆر کۆچپێکردنی فەڵەستینییەکان لە غەززە، هاوکات لوتکەکە هەوڵەکانیش بۆ دووبارە ئاوەدانکردنەوەی غەززە تاوتوێ دەکات.

 

ئەوەی پێویستە بیزانیت: 4ی ئەم مانگە دۆناڵد ترەمپ، سەرۆکی ئەمریکا ڕایگەیاند، بیرۆکەی ئەو بۆ غەززە ئەوەیە، وڵاتانی ناوچەکە خەڵکی کەرتەکە وەربگرن و ئەمریکا دەست بەسەر ئەو کەرتەدا بگرێت و بیکاتە ناوەندێکی نێودەوڵەتیی بازرگانی، ئەوەش کاردانەوەی توندی وڵاتانی عەرەبی لێکەوتەوە.

 

ڕاگەیێنراوی فەرمی: وەزارەتی دەرەوەی میسر بڵاویکردەوە، لوتکەی نائاسایی عەرەبی 27ی ئەم مانگە بەڕێوەدەچێت و تیایدا گفتوگۆ لەسەر پێشهاتە مەترسیدارەکانی پەیوەست بە دۆزی فەڵەستین دەکرێت.

 

لوتکەکە باسی چی دەکات؟

 

-گرتنەبەری ڕێکاری جیاواز بۆ بەرەنگاربوونەوەی بەزۆر کۆچپێکردنی فەڵەستینییەکان لە غەززە.

-چڕکردنەوەی هاوکارییە مرۆییەکان و دووبارە ئاوەدانکردنەوەی غەززە.

-چڕکردنەوەی فشارە نێودەوڵەتییەکان لەسەر ئیدارەی ترەمپ و ئیسرائیل بۆ ڕاگرتنی هەوڵەکانیان بۆ بەزۆر کۆچپێکردنی فەڵەستینییەکان.

-هەر پرۆسەیەکی بەزۆر کۆچپێکردن وەک هەڵمەتی لەناوبردنی ڕەگەزی بناسێنرێت.

-کاراکردنی ڕێککەوتنی بەرگری هاوبەش بۆ پاراستنی مافی گەلی فەڵەستین.

-ناردنی نامەیەکی ڕوون کە وڵاتانی عەرەبی ئامادەن بۆ گرتنەبەری هەنگاوی کرداری بۆ پاراستنی فەڵەستینییەکان.