"گەڕانەوەی ترەمپ گۆڕینی سیستمی سیاسیی عێراقی لێدەکەوێتەوە"

ئاڤا نیوز

 

پسپۆڕێکی پەیوەندییە نێودەوڵەتییەکان دەڵێت، بە گەڕانەوەی ترەمپ بۆ کۆشکی سپی گۆڕانکاری لەناوچەکەدا دێتەکایەوە و ئاشتی بە زەبری هێز دەسەپێنرێت و گۆڕینی سیستمی سیاسیی عێراقیشی لێدەکەوێتەوە.

 

وێنە گەورەکە: پەیوەست بە سیاسەتی دەرەکی ئیدارەکەی بۆ ڕۆژهەڵاتی ناوەڕاست، دۆناڵد ترەمپ سەرۆکی ئەمریکا بە ئاڕاستەی زیاتر پشتیوانیکردنی ئیسرائیل و چڕکردنەوەی سزاکانی سەر ئێران هەنگاو دەنێت، لەو چوارچێوەیەشدا داوا لە عێراق کراوە هاوکاری تاران نەبێت بۆ خۆدزینەوە لە سزاکان.

 

لێدوانی فەرمی: د.سامان سۆرانی، پسپۆڕی پەیوەندییە نێودەوڵەتییەکان لە میانی بەشداریکردنی لە بەرنامەی نان و چای ئاڤا میدیا، ئاماژەی بەوەکرد، "ئێستا بەرەی مقاوەمە لە عێراق و ناوچەکەشدا "لاوازبووە و گرووپە چەکدارەکان بێ دەنگن، ئەوەش مانای وایە ڕووداوەکان کاریگەری لەسەر عێراقیش دەبێت، ئەمساڵ عێراق دەچێتە ناو هەڵبژاردنەوە و ئەو لایەنانە تاچەند دەتوانن خۆیان کاندید بکەن و لە عێراقی ئایندەدا دروستببن، ئەوەش بەبۆچوونی ئێمە گۆڕینی سیستمی سیاسییە لە عێراق لە داهاتوودا".

 

بەشێکی دیکە لە قسەکانی د.سامان سۆرانی:

- لە ساڵانی ڕابردوودا لەڕێگەی ئاژانسی ویلایەتە یەکگرتووەکانی ئەمریکا بۆ پەرەپێدانی نێودەوڵەتی (USAID)، 11 ملیار دۆلار بۆ عێراق نێردراوە.
  
- ڕاگرتنی هاوکارییەکان لەڕێگەی (USAID)ەوە هەرچەندە بۆ ماوەی 90 ڕۆژە، بەڵام دیاریش نییە کە دەستپێدەکاتەوە یاخود نا.

- خەرجکردنی هاوکارییەکان لە عێراق جێگەی پرسیاری ئیدارەی ئەمریکایە و گومانی بوونی گەندەڵیی لەسەریان هەیە.

- ڕاگرتنی هاوکارییەکانی ئەمریکا ڕێکخراوی نەتەوە یەکگرتووەکان و ناتۆش دەگرێتەوە.

- ڕاگرتنی هاوکارییەکان کاریگەری لەسەر کەمپی ئاوارەکان دەبێت و بەڕێوەبردنیان دەخاتە مەترسییەوە.

- لە هەرێمی کوردستان چەندین ڕێکخراو هەن کە لەڕێگەی (USAID)ەوە پاڵپشتی دەکرێن، بەهۆی بڕیارەکە کارمەندەکانیانی ئەو ڕێکخراوانە بێ مووچە دەبن.

- ئیدارەی ترەمپ دەیەوێت ئاشتی بە زەبری هێز بسەپێنێت.