ئامادەنەبوونی کورد و سوننە بۆ جاری دووەم کۆبوونەوەیەک هەڵدەوەشێنێتەوە

 

ئاڤا نیوز

بەهۆی ئامادەنەبوونی نوێنەرانی کورد و سوننە، بۆجاری دووەم هاوپەیمانی ئیدارەی دەوڵەت نەیتوانی کۆبوونەوە بەپەلەکەی ئەنجام بدات.

چیرۆکی سەرەکی: لەسەر داوای سەرۆکوەزیرانی عێراق، بڕیاربوو هاوپەیمانیی ئیدارەی دەوڵەت کە هەموو لایەنە پێکهێنەرەکانی حکومەتی عێراق لەخۆدەگرێت، ڕۆژی شەممەی ڕابردوو 2025-01-08، لە کۆشکی حکومی کۆببنەوە، بەڵام بەهۆی ئامادەنەبوونی نوێنەرانی کورد و سوننەوە کۆبوونەوەکە دواخرا بۆ  شەوی یەکشەممە 2025-01-09، بەهەمان هۆکار کۆبوونەوەکە بۆ کاتێکی نادیار دواخرا.

زانیاری بەدەستهاتوو: سەرچاوەیەکی سیاسی لەبەغداوە ڕایگەیاند: هەردوو کۆبوونەوەکەی لایەنە پێکهێنەرەکانی حکومەت دواخرا، دوای ئەوەی کورد و سوننە پێشنیازێکیان خستەڕوو بۆ دەرفەتدان بە دادگای فیدڕاڵی تا چارەسەرێک بۆ ئەو فەرمانە سالارییەی بدۆزێتەوە کە بۆ ڕاگرتنی کارکردن بە سێ یاساکە دەریکردووە.

زانياری زياتر: ئەو سەرچاوەیە ئاماژەی بەوەشکرد، زۆربەی ئەندامانی چوارچێوەی هەماهەنگی لە کۆشکی حکومی ئامادەبوون بۆ بەشداریکردن لەو کۆبوونەوەیە، لەنێویاندا نووری مالیکی سەرۆکی هاوپەیمانی دەوڵەتی یاسا و عەممار حەکیم سەرۆکی ڕەوتی حیکمە .

ئەمەش بزانە: هەفتەکانی ڕابردوو عێراق قۆناغێکی سەختی بەخۆیەوە بینی، ئەمەش دوای تێپەڕاندنی هەر سێ یاسای لێبوردنی گشتی، باری کەسی و گەڕانەوەی موڵک بۆ خاوەنە ڕەسەنەکانیان. لەلایەکی دیکەش ڕۆژی سێشەممەی ڕابردوو، دادگای فیدڕاڵی بە کاتیی و تا یەکلاییبوونەوەی ئەو سکاڵایانەی لەسەریان تۆمارکراوە، کارکردنی بە یاساکان ڕاگرت.