پەرلەمانی عێراق بەدواداچوون بۆ تاوانە داراییەكانی بانكی ڕافیدەین دەكات

 

ئاڤا نیوز

پەرلەمانی عێراق لەسەر كەیسی سپیكردنەوەی پارە لەلایەن بانكی ڕافیدەینەوە، بەدواداچوون دەكات.

چیرۆكی سەرەكی: 10 ڕۆژ لەمەوبەر، جۆو ویلسن، كۆنگرێسمانی ئەمریكا، لە تۆڕی كۆمەڵایەتیی 'ئێكس' وتی: "گەنجینەی ئەمریکا و یەدەگیی فیدراڵی لە سەردەمی بایدن و برێت مەکگۆرک، ڕێگەیان بە بانکی رافیدەین دابوو کە گەورەترین بانکی عێراقە، بۆ ئەوەی ببێتە ئامرازی پارە سپیکردنەوە بۆ ڕژێمی ئێران بۆ بەدەستهێنانی دۆلاری ئەمریکی. پێویستە بانکەکە سزا بدرێت. ترەمپ ئەو بابەتە چارەسەر دەکات."

ڕاگەیێنراوی فەرمی: سیپان شێروانی، پەرلەمانتاری كورد لە پەرلەمانی عێراق لە تۆڕی كۆمەڵایەتیی 'ئێكس' ڕایگەیاند، "هەموو لایەك دڵنیا دەكەینەوە كە پەرلەمانی عێراق هەموو هەوڵێك دەدات كە بگەنە حەقیقەتی ڕاستەقینەی ئەم كێشەیە، پێشتریش وەك پەرلەمانتار داوام لە بەڕێوەبەری گشتیی بانكی ڕافیدەین كردبوو كە خشتەی ورد و درشتی قەرز و مایەی بانك و سەرجەم ئاڵوگۆڕ و حەوالەكان بۆ لیژنەی یاسایی پەرلەمانی عێراق ڕەوانە بكات بەمەبەستی گەیشتن بە ڕاستییەكان.

زانیاریی زیاتر: ئەو پەرلەمانتارە ڕوونیشی دەكاتەوە، مەترسی سپیكردنەوەی پارە لەلایەن بانكی ڕافیدەین بەشێكی بچووكی گەندەڵییە فراوانەكانی ئەو بانكەیە و لە ئاییندەیەكی نزیكدا دەگەینە حەقیقەتی بابەتەكە و بۆ ڕای گشتی ئاشكرای دەكەین.