خەرجکردنی 100 هەزار دینارەکەی خانەنشینان دەستپێدەکاتەوە

 

ئاڤا نیوز

دوای بڕینی بڕی 100 هەزار دیناری خانەنشینان لە مووچەی مانگی یەک، نووسینگەی سەرۆکوەزیرانی عێراق دەڵێت دوای پەسەندکردنی بودجەی گشتی عێراق خەرجکردنی دەستپێدەکاتەوە.

چیرۆکی سەرەکی: لە مووچەی مانگی یەك بڕی 100 هەزار دینار لە خانەنشینانی سەرتاسەری عێراق بە خانەنشنیانی هەرێمی كوردستانیشەوە بڕا،  کە پێشتر وەکو دەرماڵەی بژێوی خەرج دەکرا و لە ساڵی ڕابردووەوە خانەنشینانی کوردستانیش دەگرتەوە.

لێدوانی فەرمی: موسەنا ئەمین، ئەندامی پەرلەمانی عێراق بە ئاڤا میدیای ڕاگەیاند، بەدواداچوونیان بۆ بڕینی 100 هەزارەکە کردووە، نووسینگەی سوودانی پێی ڕاگەیاندوون، لەدوای پەسەندکردنی بودجەی گشتیی عێراق خەرجکردنی دەستپێدەکاتەوە.

زانیاریی زیاتر: پێشتریش مریەم عوسمان، بەڕێوەبەری خانەنشینیی هەرێمی كوردستان لەڕێگەی ئاڤاوە دڵنیایی دابوو ڕاگرتنی 100 هەزار دینارەکە کاتییە.

لە لایەکی دیکەوە: مووسەنا ئەمین لەبارەی پرسێکی دیکەش قسەی بۆ ئاڤا کردووە، ئەویش کەمکردنەوەی مووچەی بەشێکی خانەنشینانی سەربازییە بەتایبەت لە سنووری سلێمانی، دەڵێت کێشەی زۆری تێدایە و پەیوەندی بە پلەی سەربازییەوە هەیە، پێشتر بەشێکیان بەبێ ڕەچاوکردنی ڕێکاری یاسایی پلەیان پێدراوە و خانەنشین کراون و مەلەفی یاساییان نییە، بۆیە مووچەکانیان دەبڕێت یان بەتەواوی کەم دەکرێتەوە.