ناونیشانی وەزیفی فەرمانبەرانی کوردستان هاوتای بەغدا دەکرێت

 

ئاڤا نیوز

شاندی بەڕێوەبەرایەتیی گشتیی بودجەی کوردستان کە ئێستا لە بەغدان، کۆبوونەوەیان لەگەڵ هاوتاکانیان کردووە، تەوەرەی سەرەکی کۆبوونەوەکە ناونیشان و ژمارەی وەزیفی فەرمانبەران بووە. 

وێنە گەورەکە: هەموو فەرمانبەرێکی حکومەتی عێراق لە وەزارەتی پلاندانان ژمارە وەزیفی هەیە، لەبەرامبەردا لە هەرێمی کوردستان بایۆمەتری هەیە، دەبێت ئەمە پێکەوە بگونجێنن. وەزارەتی دارایی عێراق داوا دەکات بۆ سەرجەم فەرمانبەرانی کوردستان ژمارەی وەزیفی دابنیرێت، شاندی کوردستانیش وتوویانە ئێمە بایۆمەتریمان هەیە و لە ژمارە وەزیفی زۆر پێشکەوتووترە و زانیاری زیاتری تێدایە.

زانیاریی بەدەستهاتوو: بڕیارە وەزارەتی دارایی کوردستان بایۆمەتری مووچەخۆران ڕادەستی وەزارەتی دارایی عێراق بکات، دواتر لەلایەن وەزارەتی پلاندانانی عێراقەوە لەگەڵ یەک بگونجنێرێن.

لە لایەکی دیکەوە: بڕیارە ناونیشانی وەزیفی فەرمانبەرانی کوردستان لەگەڵ عێراق هاوتا بکرێت، ڕێککارەکانیش دەستیان پێکردووە.

زانیاریی زیاتر: هەرێمی کوردستان داوا دەکات کار بە یاسای نوێی میلاک بکرێت کە ساڵی ڕابردوو دەرچووە و لە عێراق کاری پێدەکرێت. هەردوو ئەنجوومەنی ڕاژەی نیشتمانی حكومەتی هەرێمی كوردستان و حكومەتی فیدڕاڵیش لەسەری ڕێککەوتوون.

ئەمەش بزانە: لە کۆبوونەوەکانی داهاتوو بەهەمیشەییکردنی فەرمانبەرانی گرێبەست و دەستپێکردنەوەی دامەزراندنی فەرمانبەرانی نوێش گفتوگۆی لەبارەوە دەکرێت.