فوئاد حوسێن: عێراق کار لەسەر ئامادەکردنی کارنامەیەکی گشتگیر بۆ لوتکەی عەرەبی دەکات

ئاڤا نیوز

وەزیری دەرەوەی عێراق دەڵێت، ئامادەکارییەکان بۆ بەڕێوەبردنی لوتکەی عەرەبی لە بەغدا بەردەوامن و عێراقیش کار لەسەر ئامادەکردنی کارنامەیەکی گشتگیر بۆ لوتکەی عەرەبی دەکات بەجۆرێک ئاسایش و ئارامی زیاتری ناوچەکەی لێبکەوێتەوە.

وێنە گەورەکە: لوتکەی وڵاتانی عەرەبی کۆبوونەوەی 22 وڵاتی زۆرینە عەرەبی زمانە و ساڵانە لەسەر ئاستی سەرۆککۆمار و پادشای وڵاتان بەڕێوەدەچێت، تێیدا دیارترین ئەو ئاستەنگ و دەرفەتە هاوبەشانەی ڕووبەڕووی ئەو وڵاتانە دەبێتەوە تاوتوێ دەکرێن، بڕیاریشە مانگی ئایاری ئەمساڵ لوتکەکە لە بەغدا بەڕێوەبچێت.

ڕاگەیێنراوی فەرمی: وەزارەتی دەرەوەی عێراق بڵاویکردەوە، فوئاد حوسێن، جێگری سەرۆکوەزیران و وەزیری دەرەوە سەرپەرشتی کۆبوونەوەیەکی دیکەی تایبەت بە ئامادەکارییەکانی بۆ لوتکەی عەرەبی کردووە کە بڕیارە ئەمساڵ لە بەغدا بەڕێوەبچێت، لە کۆبوونەوەکەشدا وەزیرانی ناوخۆ و کلتوور و شوێنەوار، ئەمینداری گشتی ئەنجوومەنی وەزیران، بریکاری وەزارەتی دەرەوە بۆ کاروباری کارگێڕی و هونەری و نوێنەری لایەنە پەیوەندیدارەکان بەشداربوون.

بەشێکی دیکە لە قسەکانی وەزیری دەرەی عێراق:

- ئاستی ئامادەکارییەکان بۆ سەرکەوتنی لوتکەکە و نیشاندانی عێراق وەک وڵاتێکی ئارام و ئاسایش تاوتوێ کراوە.

- عێراق کار لەسەر ئامادەکردنی کارنامەیەکی گشتگیر بۆ لوتکەکە دەکات، کە دیارترین دۆسییەکانی عەرەبی، هەماهەنگی ئابووری نێوان وڵاتان و هەوڵەکان بۆ بەدیهێنانی ئارامی و ئاسایش لە ناوچەکەدا لەخۆبگرێت.

- بەڕێوەچوونی لوتکەکە لە بەغدا، پێگەی عێراق لە ئاستی عەرەبی و هەرێمی بەهێزتر دەکات و نیشانەی ڕۆڵی گرنگی وڵاتەکەیە لە بەهێزکردنی ئاسایشدا.