نوێكردنەوەی بایۆمەتری لە هەرێمی كوردستان درێژكرایەوە

ئاڤا نیوز

كۆمیسیۆنی باڵای هەڵبژاردنەكانی عێراق، دوایین ئاماری دەرهێنان و وەرگرتنەوەی كارتی بایۆمەتری دەنگدانی بڵاوكردەوە، لە پارێزگای هەولێر زۆرترین مامەڵەی دەرهێنانی كارتی دەنگدان كراوە، هاوكات نوێكردنەوەی بایۆمەتری لە هەرێمی كوردستان درێژكرایەوە. 

وێنە گەورەكە: بەپێی بڕیارێكی نێچیرڤان بارزانی سەرۆكی هەرێمی كوردستان، 10-06-2024، هەڵبژاردنی خولی شەشەمی پەرلەمانی كوردستان دەكرێت، جموجۆڵی هاونیشتمانیانی هەرێممی كوردستان بۆ دەرهێنان و نوێكردنەوەی كارتی بایۆمەتری دەنگدان گەرمتر بووە، لەماوەی سێ مانگدا 81 هەزار كەس كارتی دەنگدانیان وەرگرتووەتەوە.

لێدوانی فەرمی: لە 01-12-2023 تاوەكو 29-02-2024، لە هەرێمی كوردستان 81 هەزار و 704 كەس كارتی بایۆمەتری دەنگدانیان وەرگرتووەتەوە، هەروەها تا 28-02-2024، 76 هەزار و 448 كەس مامەڵەی دەرهێنانی كارتی دەنگدانیان كردووە. جومانە غەلای، گوتەبێژی كۆمیسیۆنی باڵای سەربەخۆی هەڵبژاردنەكانی عێراق وای بە ئاڤا نیوز گوت.

 

زانیاریی زیاتر: " تا شەش رۆژی دیكە تۆماركردنی بایۆمەتری لە پارێزگاكانی هەرێمی كوردستان بەردەوام دەبێت".

ژمارەكان وادەڵێن: ژمارەی ئەو دەنگدەرانەی تاوەكو 28-02-2024 تۆماركراون 76 هەزار و 448 كەسن، بەمشێوەیە بەسەر پارێزگاكان دابەشبوون:-
هەولێر: 34 هەزار و 888 دەنگدەر.
دهۆك: 21 هەزار و 203 دەنگدەر.
سلێمانی: 20 هەزار و 375 دەنگدەر.