هەرێمی کوردستان داهاتی ناوخۆی مانگی یەکی بۆ بەغدا نارد

ئاڤا نیوز

 

وەزارەتی دارایی هەرێمی كوردستان، نزیكەی 52 ملیار دیناری خستە سەر هەژماری وەزارەتی دارایی عێراقی فیدڕاڵ.

ڕاگەیێنراوی فەرمی: وەزارەتی دارایی حكومەتی هەرێمی كوردستان ڕایگەیاند: گەنجینەی فیدراڵی لە داهاتی نانەوتیی هەرێمی کوردستان بۆ مانگی یەک (2025) کە بڕەکەی ( 51،895،457،877 ) پەنجاو یەک ملیار و هەشت سەد و نەوەد و پێنج ملیۆن و چوارسەد و پەنجاو حەوت هەزار و هەشت سەد و حەفتا و حەوت دینارە، بەشێوەی کاش خرایە سەر هەژماری بانکیی وەزارەتی دارایی حکومەتی فیدراڵ لە لقی هەولێری بانکی ناوەندیی عێراق.

 

ئەوەی پێویستە بیزانیت: لە ڕۆژانی ڕابردوو ئاڤا میدیا نووسراوێكی وەزارەتی دارایی عێراقی بە واژۆی تەیف سامی بڵاوكردەوە كە بەرواری 2-2-2025ی لەسەر بوو و پێكهاتبوو لە دوو داواكاری لە هەرێمی كوردستان ئەوانیش بریتین لە:-

 

یەکەم: لەگەڵ لیستی مووچە داوای لیستی ئەو فەرمانبەرانەی هەرێمی كوردستان دەکات کە هەژماریی بانکیان هەیە (هەژماری من) کە بەگوێرەی دادگای فیدراڵی پێویستە هەژماری بانکییان بۆ دروست بکرێت.

دووەم: داهاتی ناوخۆی نانەوتی مانگی یەکی ئەمساڵ بخەنە سەر هەژماری وەزارەتی داریی عێراق لە بانکی ناوەندی.