فایلی خەڵک؛ زیاتر لە 42 دۆنم زەویی ژنێک لە زاخۆ دەستی بەسەردا دەگیرێت

ئاڤا نیوز

ژنێکی بە تەمەنی خەڵکی زاخۆ، دوای ئەوەی لە ساڵی 2005 بۆ وەرگرتنی چارەسەر دەچێتە دەرەوەی وڵات، بەڵام دوای 10 ساڵ لە گەڕانەوەی بۆ کوردستان، دەبینێت دەستبەسەر تەواوی زەوییەکانیدا گیراوە. ئەو ژنە هانای بۆ ئاڤا هێناوە و داوا دەکات بەدواداچوونی بۆ بکرێت.

چیرۆکی سەرەکی: لە گوندێکی سنووری زاخۆ ژنێک هانای بۆ ئاڤا میدیا هێناوە و دەڵێت، ئەوان لە گوندەکە خاوەن 42 دۆنم زەوی کشتوکاڵی بوون و زەوییەکانیش بەناوی هاوسەرەکەی بوو،  بەڵام دواتر کۆچی دوایی دەکات ئەویش بۆ چارەسەر وەرگرتن دەچێتە دەرەوەی وڵات لە بەلجیکا، دوای 10 ساڵ، واتە لە ساڵی 2015 ئەو ژنە دەگەڕێتەوە زێدی خۆی، بەڵام ئەوکاتە پێی دەڵێن ئەو زەوییە هیچی بەناوی تۆوە نەماوە.

لێدوانی فەرمی: ئەو ژنە دەڵێت، هەموو بەڵگە و موستەمسکێکی لەبارەی خاوەندارێتی زەوییەکانەوە  وەک گرێبەست هەیە، بەڵام دراوە بە هەندێ کەسی دیکە، چەندین جار چووەتە لای لایەنی پەیوەندیدار، بەڵام کەس هیچیان بۆ نەکردووە.

ئەوەی پێویستە بیزانیت: خاتوو نادر کە هاوسەرەکەی پێشمەرگەی ئەیلوول بووە، بەڵام ئەو مووچەیەشی لێبڕاوە.

لەلایەکی دیکەوە: ئەیسەر جەرجیس، بەڕێوەبەری ناحیەی باتێلی سەر بە ئیدارەی زاخۆ لەبارەی کێشەکەوە دەڵێت:

- بابەتی زەوییەکان پەیوەندیی بەدەمەوە نەهاتنەوە هەیە کە خێزانەکە ساڵی 2010 بانگکراون بۆ چاکسازیی زەویی کشتوکاڵی بە مەبەستی تاپۆکردن، بەڵام بە هەر هۆکارێک بێت ئەو خێزانە بەدەم بانگەوازییەکەوە نەهاتوون کە گرێبەستیان بۆ هەیە بۆ ئەوەی تاپۆ بکرێن وەک زەوی کشتوکاڵی، بۆیە گرێبەستەکەیان هەڵوەشێنراوەتەوە.

- لە ڕێگەی ئاڤا میدیاوە داوا لەو ئافرەتە دەکات سەردانی ئەوان و لایەنە پەیوەندیدارەکان بکەن، بۆ ئەوەی دووبارە پێداچوونەوە بۆ بابەتەکە بکرێتەوە.