ئاڤا بەدواداچوون بۆ کێشەی کەمئەندامانی سەنگەری سەربە یەکەی 80ـی پێشمەرگە دەکات

ئاڤا نیوز

 

ئەو کەمئەندامانەی سەنگەر کە سەربە یەکەی 80ی هێزەکانی پێشمەرگەن، تاوەکو ئێستا مووچەی مانگی 1ی ئەمساڵیان  وەرنەگرتووە، سەرچاوەیەک لە یەکەی 80ی پێشمەرگەش دەڵێت، "ڕەنگە تاوەکو 15 ڕۆژی دیکە مووچە وەربگرن".

 

بابەتی سەرەکی: کەمئەندامانی سەنگەر کە سەربە یەکەی 80ی هێزەکانی پێشمەرگەی کوردستانن، وەک خۆیان دەڵێن تاوەکو ئێستا مووچەی مانگی 1ی ئەمساڵیان وەرنەگرتووە، پێشتر لەگەڵ مووچەخۆران مووچەیان پێ دەدرا، داوا دەکەن ئاڤا بەدواداچوون بۆ کێشەکەیان بکات تاوەکو بزانن هۆکاری دواکەوتنی مووچەکانیان چییە.

 

زانیاریی بەدەستهاتوو: ئاڤا پەیوەندی بە یەکەی 80ی هێزەکانی پێشمەرگە کرد، پێیان ڕاگەیاندین، "هێشتا لەلایەن وەزارەتی دارایی و ئابوورییەوە پارەیان بۆ تەمویل نەکراوە، هەروەها خانەنشینەکانمان کێشەیان هەیە، ئێمە چاوەڕوانین بۆ ئەوەی بزانین ئایا فایلەکانیان دەگوازرێتەوە بۆ سەر بەڕێوەبەرایەتی گشتیی خانەنشینی هەرێم یان نا، تاوەکو 15 ڕۆژی دیکە ئەمە ڕوون دەبێتەوە، ئەوکاتەش ڕەنگە مووچەکانیان وەربگرن.

 

زانیاریی تایبەت: سەرچاوەیەکی باڵا لە بەڕێوەبەرایەتی گشتیی خانەنشینی هەرێمی کوردستان بە ئاڤا میدیای ڕاگەیاند: لە ساڵی 2020  ئەنجوومەنی وەزیران بڕیار درا کە مووچەی کەسوکاری شەهیدان و خانەنشینی پێشمەرگە بخرێتە سەر وەزارەتی دارایی و ئابووری و بەڕێوەبەرایەتی گشتیی خانەنشینی، بەڵام ئەم بڕیارە جێبەجێ نەکرا.

 

لەلایەکی دیکە: سەرچاوەکەی خانەنشینی هەرێم دەڵێت، خانەنشینە نوێیەکانی ئەمساڵ پارەکەیان دێت بۆ لای ئێمە، جگە لەوەش ئێستا بەش بەش کار بۆ گواستنەوەی مووچەی خانەنشینان و کەسوکاری شەهید و ئەنفالکراوان بۆ سەر بەڕێوەبەرایەتیمان دەکرێت، بەڵام تاوەکو ئێستا لیستی کەمئەندامانی سەنگەرمان بۆ نەهاتووە.