یاداشتێک لە نێوان هەرێمی کوردستان و ئیمارات واژۆ دەکرێت

ئاڤا نیوز

لە چوارچێوەی سەردانەکەیدا بۆ ئیمارات و بەشداریکردنی لە لووتکەی حکومەتەکان لە دوبەی، سەرۆکوەزیران مەسرور بارزانی یادداشتێکی لەگەڵ ئیمارات واژۆ کرد.

ڕاگەیێنراوی فەرمی: بەپێی ڕاگەیێنراوی حکومەت، یادداشتێکی لێکتێگەیشتن لە نێوان هەرێمی کوردستان و ئیمارات لە بواری ئاڵوگۆڕی شارەزایی و نوێکردنەوەی کاروباری حکومەتداری واژۆ کرا.

ئەوەی پێویستە بیزانیت: یادداشتەکە لەلایەن سەرۆکوەزیران مەسرور بارزانی و محەممەد قرقاوی، وەزیری کاروباری ئەنجوومەنی وەزیرانی ئیمارات و سەرۆکی لوتکەی جیهانیی حکومەتەکان واژۆ کراوە.

بابەتە ستراتیژییەکان: یادداشتەکە نوێکردنەوەی یادداشتێکی پێشترە لە نێوان هەردوولا، بۆ ماوەی پێنج ساڵی دیکە و تایبەتە بە ئاڵوگۆڕی شارەزایی، زانیاری لە بواری دەوڵەتداری، سوود وەرگرتن لە ئەزموونی پێشکەوتووی ئیمارات لە ڕووی پێشخستنی کاروبارەکانی حکومەت، پەرەپێدانی توانا مرۆیی و دامودەزگاکانی حکومەت.

باکگراوند: ماوەی سێ ڕۆژە سەرۆکوەزیران مەسرور بارزانی لە دوبەیە، 11 کۆبوونەوەی جیاجیای لەگەڵ بەرپرسە باڵاکانی ئیمارات و وڵاتانی دیکە ئەنجام داوە، لە پانێلێکیشدا بە ناونیشانی 'تێپەڕاندنی ئاڵنگارییەکان و لەدەستنەدانی دەرفەتەکان' ڕایگەیاند: "هەوڵ دەدەین کێشە سیاسییەکانمان لەگەڵ حکومەتی فیدڕاڵی چارەسەر بکەین، لە دەرفەتەکان بڕوانینین و لەگەڵ کەرتی تایبەت کار بکەین، تاوەکو پلانەکانی چاکسازی لە حکومەت و پرۆژەکان پەرەپێبدەین".

بۆچی گرنگە: لە کۆبوونەوەکانی سەرۆکوەزیران مەسرور بارزانی، جەخت لە پەرەپێدانی پەیوەندییەکانی هەرێمی کوردستان لەگەڵ وڵاتانی جیهان، لەڕووی ئابووری، بازرگانی و وەبەرهێنان کراوە.