لە سۆران داوا دەكرێت لەگەڵ لەدایكبوونی هەر منداڵێك دارێك بچێندرێت

ئاڤا نیوز

ڕێژەی سەوزایی لە سنووری ئیدارەی سەربەخۆی سۆران بەراورد بە ئەوەی كە بە ماستەرپلان دیاریكراوە كەمە و بەرپرسانی ئیدارەكەش هۆكارەكەی ئاشكرا دەكەن و باس لە هەوڵەكانی زیاتركردنی ڕێژەكە دەكەن.

چیرۆکی سەرەکی: فەرمانگەی ژینگەی سۆران ڕێنمایی بە هاووڵاتیان دەدات كە لەگەڵ لەدایكبوونی هەر منداڵێك، نەمامێك لەلایەن كەسوكارەكەیەوە بچێندرێت، ئەمەش بەمەبەستی زیادكردنی ڕێژەی سەوزایی قەزاكە.

لێدوانی فەرمی: هەژار ماهیر، بەڕێوەبەری ژینگەی سۆران بە ئاڤا میدیای ڕاگەیاند: ڕێژەی سەوزایی لە سۆران كەمە، بەڵام هەوڵەكانی ئێمە بە زیادكردنی بەردەوامە، جگە لە لەدایكبوونی منداڵ، داواشمان كردووە هەر كەسێك كاتێك ئۆتۆمبێلێك بەناوی خۆیەوە دەكات، نەمامێك بچێنێت، بەهەمانشێوەش ئەو كەسانەی كە هاوسەرگیری دەكەن لەڕۆژی هاوسەرگیرییەكەیان بەم ئەركە نیشتمانییە هەڵسن.

لەلایەكی دیكەوە: حەكیم تێلی، جێگری سەرپەرشتیاری ئیدارەی سەربەخۆی سۆران لەمیانەی بەشداریكردنی لە بەرنامەی مۆری ئاڤا كە ژوان قەرەداغی، پێشكەشكاری ئاڤا پێشكەشی دەكات ڕایگەیاند: 45%ـی ماستەرپلانی سۆران بووەتە شار، بۆیە ئەو ڕێژەیەی كە هەیە لە ئاست ئەو ڕێژەیەی كە بووەتە شار زیاترە لە 7%، لەگەڵ ئەوەش ڕێژەكە كەمە، هۆكاری سەرەكیی كەمیی ڕێژەی سەوزایی ئەوەیە كە سۆران زۆر بە خێرایی قەرەباڵغ و فراوان بوو، ئەو بڕە پارەیەی بۆ ئاوەدانكردنی دەڤەرەكە و زیادبوونی دانیشتووانەكەی تەرخانکراوە هاوتەریب نەبوون، هەر بۆیە لەڕووی ڕێژەی سەوزاییەوە كەمێك دواكەوت.

ئەوەی پێویستە بیزانیت: ڕێژەیی سەوزایی سۆران ئێستا 7%ـە، ئەمە لە كاتێكدایە كە بەپێی ماستەر پلانی شارەكە، دەبێت 27% بێت.