لە هەولێر ژمارەیەک وەبەرهێنەر دەدرێنە دادگا

ئاڤا نیوز

بەڕێوەبەری وەبەرهێنانی هەولێر هۆشداریی دەداتە وەبەرهێنەران و دەڵێت، نابێت سەوزایی شارەكانی نیشتەجێبوون بكەن بە یەكەی نیشتەجێبوون و دەشڵێت لەسەر ئەو بابەتە چەندین وەبەرهێنەر دراونەتە دادگا.

چیرۆکی سەرەکی: لە ماوەی هەشت ساڵی ڕابردوو 25 وەبەرهێنەر لە سنووری پارێزگای هەولێر دراونەتە دادگا، پێنجیان فەرمانی دەستگیركردنیان بۆ دەرچووە و هەرێمی كوردستانیان جێهێشتووە، بەشێكیشیان ئێستا لەژێر لێكۆڵینەوەدان و بەشەكەی دیكەشیان شوێنی نیشتەجێبوون و مانەوەیان نادیارە، ئەوانەشی كە دادگایی كراون سزای دارایی دراون.

لێدوانی فەرمی: سامان عارەب، بەڕێوەبەری وەبەرهێنانی هەولێر، لە چوارچێوەی بەشداریكردنی لە بەرنامەی مۆری ئاڤا ڕایگەیاند:

-هیچ وەبەرهێنەرێك بۆی نییە سەوزایی پڕۆژەكەی بكات بە یەكەی نیشتەجێبوون، هەر كەسێك ئەمە بكات بە زێدەڕۆیی هەژمار دەكرێت بەو هۆیەوە لە ماوەی ڕابردوو چەندین وەبەرهێنەر دراونەتە دادگا و سزای دراون.

- دەبێت ڕێژەی سەوزایی هەر پڕۆژەیەكی نیشتەجێبوون زیاتر بێت لە 25%، هەر پڕۆژەیەكیش وەك پێویست سەوزایی نەبێت ئەوا نابێت پارەی خزمەتگوزاریی سەوزایی لە دانیشتووانەكەی وەربگرێت.

ئەمەش بزانە: لە ساڵی 2006ـەوە تاوەكو ئێستا تەنیا لە سنووری هەولێر مۆڵەتی نیشتەجێبوون بە 130 هەزار یەكەی نیشتەجێبوون دراوە كە لە چوارچێوەی 110 مۆڵەتی وەبەرهێنانە، 56 هەزار یەكەی نیشتەجێبوون خەڵكیان تێدا دەژی و بەشەكەی تر لەژێر دروستكردندان، لە داهاتوویەكی نزیكدا 30 هەزاریان تەواو دەبن و خەڵكیان تێدا دەژیت.