شەش پڕۆژەی زیادکردنی ڕێژەی سەوزایی لە سنووری دهۆک لە قۆناغی جێبەجێکردندان

 

ئاڤا نیوز

بەڕێوەبەرایەتی گشتی شارەوانییەکانی دھۆک بە پلان کار لەسەر زیادکردنی ڕووبەری سەوزایی لە سنوورەکەی دەکات، ئێستا شەش پڕۆژەی زیادکردنی ڕێژەی سەوزایی لە ناوچە جیاوازەکانی سنووری بەڕێوەبەرایەتییەکە لە قۆناغی جێبەجێکردندان.

وێنە گەورەکە: ڕێژەی سەوزایی سنووری پارێزگای دهۆک 12% ـیە و  کار لەسەر ئەوە دەکرێت ڕێژەکە بۆ سەرووی 17% بەرز بکرێتەوە، لە ساڵی ڕابردوو 10 پڕۆژەی زیادکردنی سەوزایی لە سنووری بەڕێوەبەرایەتی گشتیی شارەوانییەکانی  دهۆک خراونەتە بواری جێبەجێکردن، هاوکات ڕێژەی سەوزایی دارستانە خۆڕسکەکانی دەورووبەر سەرووی 50% ـیە.

لێدوانی فەرمی: ئەمیر ئەتروشی، وتەبێژی بەڕێوەبەرایەتی شارەوانییەکانی دھۆک بە ئاڤای گوت، "چوار پڕۆژەی زیادکردنی سەوزایی تەواوبوون و شەشی دیکە لە قۆناغی جێبەجێکردندان، کە دروستکردنی پاڕك و پڕۆژەی سەوزایی نێوان شەقامەکان،  لە سنووری قەزا و ناحییەکانی دهۆک جێبەجێ دەکرێت."

ئەمەش بزانە: 168 پاڕک لە سنووری دهۆک هەن،  883 هەزار و  723 مەتر چوارگۆشە ڕووبەری سەوزایی پێکدەهێنن، هاوکات ڕووبەری سەوزایی لەنێوان شەقامەکان 199 هەزار و 23 مەتر چوارگۆشەیە.