ئیمارات ئامادەیی دەردەبڕێت بۆ هاوکاری هەرێمی کوردستان لە باشترکردنی کارەبا

ئاڤا نیوز

سەرۆکوەزیران مەسرور بارزانی لە دوبەی، لەگەڵ سوهەیل ئەلمەزروعی، وەزیری وزە و ژێرخانی ئیمارات کۆبووەوە، لە کۆبوونەوەکەدا پەرەپێدانی هاریکاری و هاوئاهەنگیی لەنێوان هەردوولا لە بواری وزە و پێشخستنی ژێرخانی ئابووری تاوتوێ کرا، ئیماراتیش ئامادەیی دەربڕی لە بواری وزە و وزەی نوێبووەوە و کارەبادا هاوکاری هەرێمی کوردستان بکات.

وێنە گەورەکە: شاندی باڵای هەرێمی کوردستان بە سەرۆکایەتی مەسرور بارزانی، سەرۆکوەزیرانی هەرێمی کوردستان، سێ ڕۆژە بۆ بەشداری لە لووتکەی جیهانی حکومەتەکان لە شاری دوبەی ئیماراتن، لە پەراوێزی لووتکەکەشدا سەرۆکوەزران مەسرور بارزانی چەندین دیدار و کۆبوونەوەی سیاسی و دیبلۆماسی و ئابووری گرنگی هەبووە بۆ هەرێمی کوردستان.

ڕاگەیێنراوی فەرمی: نووسینگەی سەرۆکوەزیرانی هەرێمی کوردستان ڕایگەیاند،  "لە کۆبوونەوەکەدا کە قوباد تاڵەبانی، جێگری سەرۆکی حکومەت ئامادەی بوو، سەرۆکوەزیران مەسرور بارزانی، کورتەیەکی دەربارەی چاکسازییەکانی حکومەت لە بواری وزە و باشترکردنی کەرتی کارەبا و خزمەتگوزارییە گشتییەکان و هەوڵەکانی حکومەت بۆ دابینکردنی کارەبای 24 کاتژمێریی لە هەرێمی کوردستان لە کۆتایی ساڵی 2026 خستەڕوو".

لەلای خۆشییەوە سوهەیل ئەلمەزروعی، وەزیری وزە و ژێرخانی ئیمارات، "ئامادەیی وڵاتەکەی دەربڕی بۆ هاوکاریکردنی هەرێمی کوردستان، لە سوودوەرگرتن لە شارەزایی ئیمارات لە بواری وزە و وزەی نوێبووەوە و کارەبادا".