کۆبوونەوەیەکی گرنگ لەبارەی پرسی مووچە و فەرمانبەران دەکرێت

ئاڤا نیوز

 

ئەمڕۆ پێنجشەممە لە وەزارەتی داریی و ئابووریی هەرێمی کوردستان، کۆبوونەوەیەکی گرنگ لەبارەی مووچە و فەرمانبەران بەڕێوەچوو کە هەردوو تیمی خانەنشینی و میلاکات تیایدا بەشداربوون.

 

چیرۆکی سەرەکی: هەفتەی ڕابردوو دوو تیمی وەزارەتی دارایی هەرێمی کوردستان سەردانی بەغدایان کرد، کە تیمێکیان بەسەرۆکایەتیی مریەم عوسمان، بەڕێوەبەری گشتیی خانەنشینی بوو، کە لە گفتوگۆکانیان دوای چاوەوەڕوانییەکی زۆر رێککەوتنی کۆتایی لەبارەی هاوتاکردن و ناردنی مووچەی خانەنشینانی مەدەنی لێ کەوتەوە، تیمی دووەمیش بەسەرۆکایەتیی نەهرەوان گەنجۆ، بەڕێوەبەری میلاک بوو لە بەڕێوەبەرایەتی گشتیی بودجە.

 

زانیاریی زیاتر: لە کۆبوونەوەکەی ئەمڕۆدا کە ئاوات شێخ جەناب، وەزیری دارایی و ئابووری بەشدار بوو، ئەو سەرنج و تێبینیایەنی وەزارەتی دارایی عێراق و لایەنە پەیوەندیدارەکان هەیانبووە هەم لەبارەی فەرمانبەران و هەم لەبارەی خانەنشینان خراونەتەڕوو.

 

زانیاریی بەدەستهاتوو: ئاڤا میدیا زانیویەتی، دوای ئەوەی کێشەی هاوتاکردنی مووچەی خانەنشینانی مەدەنی کۆتایی هات، لەمەودوا گۆرانکاری لە مووچەی فەرمانبەران دەستپێدەکات، واتا ئەوانەی ئێستا لە ئەرکدان، گۆڕانکارییەکانیش زۆر و فراوانن، مووچەی بەشێک لە فەرمانبەران کەم دەکات بەتایبەت فەرمانبەرانی پلە یەک و دوو و سێ، مووچەی بەشێکی فەرمانبەرانیش زیاد دەکات ئەوانەی پلەی وەزیفییان نزمە.

 

هۆکارە زانراوەکان: بەغدا داوای هاوتاکردنی پلەی وەزیفی کردووە و دەبێت سەرجەم پلە وەزیفییەکان وەک بەغدا لێ بکرێت.