لە ساڵێكدا نزیكەی 12 هەزار كارتی زەوی تاپۆ كراون

ئاڤا نیوز

بەڕێوبەرایەتيی گشتيی تۆمارکردنی خانووبەرە لە هەرێمی کوردستان ئاشكرای دەكات، تەنیا لە ساڵی  2024ـدا، 11 هه‌زار و 791  کارتی زەوییان بۆ سەنەد گۆڕيوه‌ و سەرجەم مامەڵەکانیان تەواو کردوون، هاوكات 30 فەرمانگەی تۆماركردنی خانووبەرە، بەئەلیكترۆنی كراون و سەرجەم تۆماری موڵكەكان بە دیجیتاڵی كراون.

وێنە گەورەكە: بەڕێوبەرایەتيی تۆمارکردنی خانووبەرە لە هەرێمی کوردستان، وەك یەكێك لە دامەزراوە گرنگەكانی سەر بە وەزارەتی دادی حکومەتی هەرێـمی کوردستان، ڕۆژانە زۆرترین خزمەتگوزاری پێشکەشی هاووڵاتیيان دەکات لە بواره‌كانى زەویوزار، تاپۆکردنی موڵک، عەقاراتی هاووڵاتیيان، پاراستنی موڵک و زەویوزارەکانیان، پێدانی سەنەدی تاپۆ و گۆڕینی کارتی زەوییەکان بۆ سەنەد.

ڕاگەیێنراوی فەرمی: بەگوێرەی ئاماری فەرمی وەزارەتی داد، تەنیا لە ساڵی 2024ـدا 11 هه‌زار و 791 کارتی زەوییان بۆ سەنەد گۆڕيوه‌ و سەرجەم مامەڵەکانیان تەواو کردوون و نزیکەی دوو هه‌زار و 711 نەخشەی (کادسترۆی) تایبەت بە پارێزگه‌ی دهۆک داناوە، لەسەر بەرنامەی ( G.I.S) و بەردەوامیشە.

ژمارەكان وادەڵێن: کۆی گشتی سەرجەم مامەڵەکان و کارە خزمەتگوزارییەکانی بەڕێوبەرایەتيی گشتيی تۆمارکردنی خانووبەرە لە هەرێمی کودستان لە ساڵێكدا، گەیشتووه‌ته‌ مليۆنێك و 773 هه‌زار و 513 مامەڵە. لەو ژمارەیەدا مليۆنێك و سێ هه‌زار و 733 مامه‌ڵه‌ى فرۆشتن، بەموڵکردن و ڕاستکردنەوەی ڕەگەز بووە، هەروەها 30 فەرمانگەی تۆمارکردنی خانووبەرە بەئەليکترۆنی کراون و سەرجەم تۆمارە کەسییەکان و تۆمارکردنی گلدانەوە لە فەرمانگەکان، بەئەليکترۆنی کراون، ئەوەش بە مەبەستی پاراستنی مافی خاوەن موڵک و ئەو کەسانەی کە نیشانەی گلدانەوەیان لە بەرژەوەندی دانراوە.