هاوسەرۆكی كەجەكە: ئۆجەلان دەیەوێت كێشەی كورد لە زەمینەی شەڕەوە بخاتەسەر زەمینەیەكی سیاسی و یاسایی

 

ئاڤا نیوز

هاوسەرۆكی كەجەكە ئاشكراى دەكات، عەبدوڵڵا ئۆجەلان نامەیەكی بۆ ناردوون، ڕاشیگەیاند ئۆجەلان رژدە لەسەر ئەوەی كێشەی كورد لە زەمینەی شەڕەوە بخاتە سەر زەمینەیەكی سیاسی و یاسایی.

وێنە گەورەكە: جارێكی تر چارەسەری ئاشتییانەی پرسی كورد لە توركیا بووە بە ڕۆژەڤی توركیا و ناوچەكە، تائێستا شاندی دەم پارتی دووجار سەردانی ئۆجەلانیان كردووە لە ئیمراڵی و بڕیارە عەبدوڵڵا ئۆجەلان سبەی شەممە پەیامێك بڵاوبكاتەوە.

لێدوانی فەرمی: جەمیل بایك، هاوسەرۆكی گشتیی كۆما جڤاكێن كوردستان-كەجەكە، لە میانی بەشدارییكردنی لە بەرنامەیەكی تایبەتی كەناڵی 'ستێرك تیڤی'ـدا ڕایگەیاند: "ڕێبەر ئاپۆ نامەیەكی بۆ ناردووین".

ئاماژەی بەوەشكرد، عەبدوڵڵا ئۆجەلان ڕێبەری زیندانیكراوی پەكەكە دەیەوێت ئەو هەنگاوەی پێشتر دەستی پێكردووە، ئێستا بە ئامانجێكی گەورەتری بگەیەنێت، كێشەی كورد لە زەمینەی شەڕەوە بخاتەسەر زەمینەیەكی سیاسیی و یاسایی.