پەروەردەكانی سنووری پارێزگای سلێمانی بڕیار لەبارەی شكاندنی بایكۆت دەدەن

ئاڤا نیوز

 

بەڕێوەبەری پەروەردەكانی سلێمانی، هەڵەبجە، گەرمیان و ڕاپەڕین لە شاری سلێمانی كۆدەبنەوە و بڕیار لەبارەی شكاندنی بایكۆتی خوێندن لە سنوورەكە دەدەن.

 

چیرۆكی سەرەكی: مامۆستایانی سنووری پارێزگاكانی سلێمانی و هەڵەبجە، نزیكەی دوو مانگە بایكۆتی قوتابخانەكانیان كردووە و دەوام ناكەن، بەو هۆیەوە پرۆسەی خوێندن وەستاوە، بەڕێوەبەرایەتییەكانی پەروەردەی سنوورەكەش لە هەوڵی دەستپێكردنەوەی پرۆسەكەدان.

 

زانیاریی بەدەستهاتوو: بەپێی زانیارییەكانی ئاڤا میدیا، كاتژمێر (10:30) خولەكی پێشنیوەڕۆی ئەمڕۆ شەممە 15-2-2025، لە بەڕێوەبەرایەتیی گشتیی پەروەردەی سلێمانی بە ئامادەبوونی بەڕێوەبەری پەروەردەكانی سلێمانی، هەڵەبجە، گەرمیان، ڕاپەڕین كۆبوونەوەیەك دەستی پێكردووە بۆ گفتوگۆكردن سەبارەت بە بڕیاری شكاندنی بایكۆتی خوێندن لە سنوورەكە، ئامانجی كۆبوونەوەكەش ئەوەیە بەیەكەوە بڕیاری دەستپێكردنەوەی پرۆسەی خوێندن بدەن.

 

ئەوەی پێویستە بیزانیت: لە ڕۆژی 18-12-2024ەوە مامۆستایانی سنووری سلێمانی، هەڵەبجە، گەرمیان، ڕاپەڕین، بەهۆی دواكەوتنی دابەشكردنی مووچە بایكۆتی قوتابخانەكانیان كردووە و دەوام ناكەن، بەو هۆیەوە پرۆسەی خوێندن لەو شارانە وەستاوە و تاوەكوو ئێستا دەستی پێنەكردووەتەوە.