بەهۆی بارینی بەفرێکی زۆر هاتووچۆی بازرگانی لە دەروازەی کێلێ پەکی دەکەوێت

ئاڤا نیوز

 

بەهۆى بارینى بەفرێکى زۆر لە دەروازەی سنووریی کێلێ لە قەزای پشدەر، هاتووچۆى بازرگانى پەکى کەوتووە بەڵام هاتووچۆی هاووڵاتییان لە دەروازە سنوورییەکە بەردەوامە.

 

وێنە گەورەکە: لە چەند ڕۆژی ڕابردوو بەفرێکی زۆر لە ناوچە شاخاوییەکانی هەرێمی کوردستان باری، بەڵام ڕێژەی بارینەکە لە شوێنێک بۆ شوێنێکی دیکە جیاواز بوو، لە کێلێ لە سنووری قەزای پشدەر زیاتر لە 20 سانتیم بەفر باری و بووە هۆی پەکخستنی هاتووچۆی بازرگانی لەو خاڵە سنووریەی نێوان عێراق و ئێران.

 

لێدوانی فەرمی: سەرچاوەیەک لە مەرزی کێلێ بە ئاڤای ڕاگەیاند: بەهۆی بەرینی 20 سانتیم بەفر لە دەروازەی سنووریی کێلێ هاتووچۆی بازرگانی پەکی کەوتووە، بەڵام هاتووچۆی هاووڵاتییان لە خاڵە سنوورییەکە ئاساییە. لەبارەی دەستپێکردنەوەی هاتووچۆی بازرگانی، ئەو سەرچاوەیە دەڵێت، لەوانەیە سبەی هاتووچۆی بازرگانی دەستپێبکاتەوە.

 

ئەوەی پێویست بیزانیت: مەرزی كێلێ یەكێكە لە دەروازە سنوورییەكانی نێوان هەرێمی كوردستان و ڕۆژهەڵاتی كوردستان و ئێران و ڕۆژانە نزیكەی 150 تا 200 بارهەڵگر و 800 گەشتیار لە رێگای ئەو دەروازەیەوە هاتووچۆ دەکەن؛ كەرەستەی بیناسازی و پیشەسازی لەوێوە هاوردەی هەرێمی كوردستان و عێراق دەكرێن.