سەرۆکی باندی سواڵکەرانی کەرکووک دەستگیر کرا

ئاڤا نیوز

فەرماندەی پۆلیسی کەرکووک لەسەر نووسراوێکی پارێزگاری شارەکە ئۆپەراسیۆنێکی بۆ دەستگیکردنی ئەو سواڵکەرانە کرد کە لەترافیک و شەقامە گشتییەکان منداڵانی خوار 18 ساڵ و ژنی بەتەمەنیان بەکارهێناوە و ڕۆژانە سەدان ملیۆن دیناریان بەوهۆیەوە کۆکردووەتەوە.

چیرۆکی سەرەکی: دوای نووسراوی د. ئەحمەد کەرکووکی، سەرۆکی لیژنەی خزمەتگوزارییەکان لە ئەنجوومەنی پارێزگای کەرکووک؛ پارێزگاری کەرکووک نووسراوێکی ئاراستەی فەرماندەیی پۆلیسی کەرکووک کرد سەبارەت بە نەهێشتنی دیاردەی سواڵکردن و ئەوانەی بە دانانی سندوقی تایبەت بە کۆکردنەوەی پارە بۆ کاری خێرخوازی بەبێ مۆڵەت خەریکی کۆکردنەوەی کۆمەک و هاوکارین، دەبێت دەستگیر بکرێن، دەرەنجام سەرۆکی باندێکیان دەستگیرکرد کە ڕۆژانە زیاتر لە 50 منداڵی لە ترافیک و شەقامە گشتییەکان بەکاردەهێنا.

ئەوەی پێویستە بیزانیت: دوای دەستگیرکردنی ئەو باندە،

- پۆلیس سەدان لافیتەی دەست بەسەردا گرتووە کە بەئامانجی کۆکردنەوەی هاوکاری بەناوی جیاواز بەکارهێنراون.

- دەستبەسەرداگرتنی نووسراوی تەزویر کە بەهۆی ئەو نووسراوانە خۆیان وا پیشان داوە کە نەخۆشی درێژخایەنیان هەیە.

لێدوانی فەرمی: د. ئەحمەد کەرکووکی، بە ئاڤای گوت، "ئەو سەرۆک باندە ڕۆژانە زیاتر لە 10 کاتژمێر کاری بەو منداڵانە کردووە و لەبەرامبەردا 10 هەزار دیناری پێداون."