بارەگای بارزانی: کردنەوەی لقی حزبی بەعس لە کوردستان دوورە لە ڕاستییەوە

 

ئاڤا نیوز

بارەگای بارزانی لەبارەی لێدوانێکی ئەیاد عەللاوی، سیاسەتمەداری عێراق گوایە لقی حیزبی بەعس لە هەرێمی کوردستان کراوەتەوە هاتە دەنگ و ڕەتیکردەوە.

چیرۆکی سەرەکی: ئەمڕۆ شەممە، ئەیاد عەللاوی، سیاسەتمەداری عێراق لەگەڵ چەندین کەسایەتی دیکە دامەزراندنی کۆمەڵەی مەدەنیی نیشتمانیی عێراقی ڕاگەیاند، لە گوتارێکی دا بەو بۆنەیەوە بانگەشەی ئەوەی کرد گوایە پارتی دیموکراتی کوردستان، لقێکی بۆ حیزبی بەعس لە هەرێمی کوردستان کردووەتەوە، بی ئەوەی هیچ وردەکارییەک یان بەڵگەیەک ئاشکرا بکات.

ڕاگەیێنراوی فەرمی: بارەگای بارزانی لە ڕاگەیێنراوێکدا ڕایگەیاند: "ئەوەی ئەیاد عەلاوی لەبارەی کردنەوەی لقێکی حیزبی بەعس لە کوردستان باسی کردووە، دوورە لە ڕاستی و لەهەمانکاتیشدا ڕایدەگەیێنین ئەم جۆرە قسانە جێگەی سەرسووڕمانێکی زۆر و جێگەی پرسیارن کە بۆ ئەم قسانەی کردووە کە ڕاست نین".

هاوکات بارەگای بارزانی جەختیشی کردەوە، دەرگەی کوردستان و هەولێر کراوەیە بۆ هەموو هاووڵاتییەکی عێراقی کە بە ئازادییەوە تێدا بژیێت.