لە هەولێر و سلێمانی شایستەی دارایی کارمەندانی سەر سندووق خەرج دەکرێت

ئاڤا نیوز

 

ئەمڕۆ یەکشەممە 15 هەزار کارمەندی سەر سندووق کە لە هەڵبژاردنی خولی شەشەمی پەرلەمانی کوردستان بەشداربوون، لە سنووری هەولێر و ئیدارەی سەربەخۆی سۆران لەڕێگەی 23 بانکەوە شایستە داراییەکانیان وەردەگرن، لە چەند ڕۆژی داهاتووشدا لە سلێمانی دابەشکردنی شایستە داراییەکان دەست پێدەکات.

 

وێنە گەورەکە: چوار مانگ بەسەر پرۆسەی هەڵبژاردنی خولی شەشەمی پەرلەمانی کوردستان تێپەریووە، 41 هەزار کارمەند سەرپەرشتی پرۆسەکەیان دەکرد و هێشتا بەشی زۆریان شایستە داراییەکانیان وەرنەگرتووە، ماوەی هەفتەیەکە دابەشکردنی شایستە داراییەکان دەستیپێکردووە، لە دهۆک پرۆسەکە نزیکە لە تەواوبوون و ئەمڕۆش لە هەولێر دەستپێدەکات و لە چەند ڕۆژی داهاتووش لە سلێمانی دابەش دەکرێت.

 

زانیاریی بەدەستهاتوو: ئۆفیسی سلێمانی کۆمیسیۆنی هەڵبژاردنەکانی عێراق، لەگەڵ چەند بانکێک هەماهەنگی کردووە، هاوکات بەهۆی زۆری ژمارەی کارمەندان پرۆسەکە دواکەتووە، دوای دیاریکردنی سەرجەم بانکەکانیش لە ماوەی چەند ڕۆژی داهاتوودا دەست بە خەرجکردنی پارەکە دەکرێت.

 

ئەمەش بزانە: لە کۆی 41 هەزار کارمەندی سندووق، زیاتر لە 16 هەزاریان دەکەونە سنووری پارێزگاکانی سلێمانی و هەڵەبجە، شایستە داراییەکانیان بەگوێرەی ئەرک و بەرپرسیارێتیان لەنێوان 100 هەزار بۆ 350 هەزار دینارە.