سەرۆککۆماری عێراق ئیمزای لەسەر هەمواری یاسای بودجە کرد

ئاڤا نیوز

 

14 ڕۆژ دوای دەنگدان لەسەر هەمواری یاسای بودجە کە تایبەتە بەدەستپێکردنەوەی هەناردەی نەوتی هەرێمی کوردستان، ئەمڕۆ یەکشەممە سەرۆککۆماری عێراق واژۆی لەسەر هەموارەکە کرد، بەمەش هەنگاوە کردەییەکان بۆ دەستپێکردنەوەی هەناردەی نەوتی کوردستان کارا دەبن.

 

وێنە گەورەکە: بۆ چارەسەرکردنی دۆسیەی نەوت لەنێوان هەولێر و بەغدا، بڕیار لەسەر هێنانی کۆمپانیایەکی ڕاوێژکاریی نێودەوڵەتی دراوە بۆ ئەوەی خەرجی بەرهەمهێنان و گواستنەوەی نەوتی هەر کێڵگەیەکی نەوتی هەرێمی کوردستان دیاری بکات، دەستبەکاربوونی ئەو کۆمپانیایە لەسەر چەسپاندنی ئەو هەموارە دوای واژۆی سەرۆککۆماری عێراق وەستابوو.

 

زانیاریی بەدەستهاتوو: هەمواری یاساکە لەلایەن لەتیف ڕەشید، سەرۆککۆماری عێراق واژۆی لەسەرکرا و دواتر لە ڕۆژنامەی وەقائعی عێراق بڵاودەکرێتەوە ئینجا هەنگاوەکانی دیکە دەستپێدەکەن.

 

ئەمەش بزانە: بەگوێرەی ڕێککەوتنی نێوان هەولێر و بەغدا، هەناردەی نەوتی هەرێمی کوردستان ڕادەستی کۆمپانیای سۆمۆ دەکرێت و وەزارەتی دارایی فیدراڵ بۆ تێچووی دەرهێنان و گواستنەوەی هەر بەرمیلێک نەوت 16 دۆلار خەرج دەکات تاوەکو تێچووەکەی لەلایەن ئەو کۆمپانیا ڕاوێژکارییە دیاری دەکرێت.