چاودێری دارایی: تێبینییەكان لەسەر خەرجی و داهاتی هەرێمی كوردستان زۆر كەمبوونەتەوە

 

ئاڤا نیوز

تیمی هاوبەشی دیوانی چاودێری دارایی عێراق و هەرێمی كوردستان بۆ ئامادەكردنی ڕاپۆرتێك لەسەر خەرجی و داهاتی شەش مانگی كۆتایی ساڵی ڕابردوو، ئێستا لە هەرێمی كوردستانن، دەشڵێن، دەرەئەنجامی هەوڵ و هەماهەنگییەكانی حكومەتی هەرێمی كوردستان وایكردووە، تێبینییەكان لەسەر خەرجی و داهات بەشێوەیەكی بەرچاو كەم ببنەوە.

چیرۆكی سەرەكی: ئەمڕۆ یەکشەممە، وەزیری دارایی و ئابووری هەرێمی كوردستان، پێشوازی لە تیمی هاوبەشی دیوانی چاودێری دارایی عێراق و هەرێمی كوردستان كرد كە پێكهاتبوون لە فەریق سلێمان، بەڕێوەبەری گشتی دیوانی چاودێری دارایی هەرێمی کوردستان و دکتۆر حەیدەر خالخال و دکتۆر عەلی خوزەیەر، بەڕێوەبەرانی گشتی لە دیوانی چاودێری دارایی حکومەتی فیدراڵی.

بابەتە ستراتیژییەكە: تیمی هاوبەشی دیوانی چاودێری دارایی عێراق و هەرێمی كوردستان بڕیارە ڕاپۆرتێک لەسەر خەرجی و داهاتی شەش مانگی کۆتایی ساڵی ڕابردووی هەرێمی کوردستان لەسەر بنەمای ڕاپۆرتەکانی تەرازووی پێداچوونەوە (میزان موراجەعە)ـەی مانگانە ئامادە بکەن.

ڕاگەیێنراوی فەرمی: بەگوێرەی ڕاگەیێنراوی پێگەی فەرمی وەزارەتی دارایی هەرێمی كوردستان، ئاوات شێخ جەناب، وەزیری دارایی و ئابووری، ئامادەیی وەزارەت و سەرجەم بەڕێوەبەرایەتییەکانی بۆ سەرخستنی کارەکانیان دووپات کردەوە و ڕایگەیاند، دەرگای وەزارەت و دامەزراوەکان بەردەوام کراوەیە بۆ تیمەکان تا بتوانن لەنزیکترین کاتدا ڕاپۆرتی خۆیان ئامادە بکەن.

لەلایەكی دیكەوە: تیمی هاوبەشی دیوانی چاودێری دارایی، سوپاسی پشتیوانی و هەماهەنگیەکانی وەزیری داراییان کرد کە هەمیشە هاوکار بووە لەماوەی ڕابردوودا بۆ ئەوەی کارەکان بەباشی بەڕێوە بچن، دەرئەنجامی ئەو هەوڵانەش وایکردووە تێبینیەکانی تیمەکان لەسەر ڕاپۆرتەکان بەشێوەیەکی بەرچاو کەم ببنەوە.