شاندی دەم پارتی لەگەڵ نێچیرڤان بارزانی کۆبوونەوە

ئاڤا نیوز

 

لەچوارچێوەی سەردانەکەیاندا بۆ هەرێمی کوردستان، شاندێکی دەم پارتی ڕۆژی یەکشەممە لەگەڵ سەرۆک بارزانی کۆبوونەوە و ئەمڕۆ دووشەممەش سەردانی سەرۆکی هەرێمی کوردستانیان کردووە. 

 

وێنە گەورەکە: ماوەی دوو ڕۆژە شاندێکی دەم پارتی لە هەرێمی کوردستانن، کە ئەندامانی پێکهاتوون لە، پەروین بوڵدان و سڕی سورەیا ئۆندەر، هەروەها هاوسەرۆکی دەبەپە ئۆزگور ئەرۆڵ و پەرلەمانتاران گوڵجان کاچماڵس و مەهمەت کاماچ، ڕۆژی یەکشەممە لەگەڵ سەرۆک بارزانی کۆبوونەوە و پێش نیوەڕۆی ئەمڕۆ دووشەممەش سەردانی سەرۆکایەتی هەرێمی کوردستانیان کرد و لەگەڵ نێچیرڤان بارزانی کۆبوونەوە، ئامانج لە سەردان و کۆبوونەوەکانیشیان باسکردنە لە پرسی پڕۆسەی ئاشتی.

 

ڕاگەیێنراوی فەرمی: دەم پارتی ڕایگەیاند، دوای بە دوای کۆبوونەوەیان لەگەڵ سەرۆکایەتیی هەرێمی کوردستان، بڕیارە نیوەڕۆ ئەمڕۆش لە باڵەخانەی پارێزگای هەولێر، کۆنگرەیەکی ڕۆژنامەوانی لەبارەی ئامانجی سەردانەکەیان بخەنەڕوو.

 

لەلایەکی دیکەوە: ڕۆژی یەکشەممە، نێچیرڤان بارزانی، سەرۆکی هەرێمی کوردستان لە پەراوێزی کۆنفرانسی ئاسایشی میونشن لە ئەڵمانیا لە کۆنگرەیەکی ڕۆژنامەوانیدا ڕایگەیاند، ڕۆژی دووشەممە لە هەولێر پێشوازی لە شاندی دەم پارتی دەکەم، دەخوازم پارتی کرێکارانی کوردستان 'پەکەکە' پێشوازی لە پەیامی ئاشتی عەبدوڵڵا ئۆجەلان بکات. 

 

ئەوەی پێشبینی دەکرێت: بڕیارە دوانیوەڕۆی ئەمڕۆ شاندەکە بەرەو سلێمانی بەڕێبکەون بۆ کۆبوونەوەیان لەگەڵ بافڵ تاڵەبانی، سەرۆکی یەکێتی نیشتمانیی کوردستان،.