پەیامێکی تایبەتی سەرۆک بارزانی لە ئاڤا میدیاوە بۆ جووتیارانی کەرکووک

ئاڤا نیوز

دوای ئەوەی جووتیارانی سنووری کەرکووک لەڕێگەی ئاڤا میدیاوە داوایان لە سەرۆک بارزانی کرد بەهانایانەوە بچێت، تەنیا دوای نیو کاتژمێر پەیامێکی سەرۆک بارزانی بۆ ئاڤا نێردرا کە قسە لەگەڵ بەغدا کراوە ئەم ڕەفتارانە مایەی قبووڵکردن نین و دەبێی کۆتایییان پێ بهێنرێت.

چیرۆکی سەرەکی: ماوەی چەند ساڵێکە سوپای عێراق ڕێگری لە جووتیارانی کوردی پارێزگای کەرکووک دەکات کە زەوییەکانیان بکێڵن، بەتایبەت ئەو ناوچانەی کوردستانین و لە دەرەوەی ئیدارەی هەرێمی کوردستانن و خاوەندارێتییان دراوە بە عەرەبی هاوردە.

ئێوارەی ئەمڕۆ لە گوندی شەناغەی قەزای پردێ سوپای عێراق ڕێگری لە جووتیاران کرد زەوییەکانیان بکێڵن و بارگرژی دروست بوو، ئەمە لەکاتێکدایە لە پەرلەمانی عێراقیش یاسا دەرچووە زەوییەکان بۆ خاوەنە ڕەسەنەکانیان بگەڕێنرێنەوە، دوای گرژییەکەش جووتیارەکانی ئەو گوندە لەڕێگەی ئاڤاوە داوایان لە سەرۆک مەسعود بارزانی کرد بەهانایانەوە بچێت.

زانیاری تایبەت بە ئاڤا میدیا: سەرۆک مەسعود بارزانی لەسەر ڕووداوەکانی ئەمڕۆی گوندەکانی سەرگەڕان، پەیامی بۆ بەغدا ناردووە، لە پەیامەکەدا هاتووە، "ئەم ڕەفتارانەی بەغدا مایەی قبووڵکردن نین و دژی یاسا و دەستووریشن و دەبێ کۆتاییان پێ بهێنرێت، هەرچی پێویستیش بێت بۆ پاراستنی مافی یاسایی و دەستووری جووتیارانی کورد دەیکەین".

ئەوەی پێویستە بیزانیت: ڕۆژی 21-1-2025 پەرلەمانی عێراق دەنگیدا لەسەر هه‌ڵوه‌شاندنه‌وه‌ی بڕیاره‌كانی ڕژێمی به‌عس سه‌باره‌ت به‌ زه‌وییه‌كانی پارێزگای كه‌ركووك و گەڕانەوەی ماف بۆ خاوەن ماف، بەپێی ئەم یاسایەش زیاتر لە 300 هەزار دۆنم زەوی بۆ جووتیارانی کورد و تورکمان لە کەرکووک، خورماتوو، خانەقین و ناوچە کوردستانییەکان دەگەڕێنرێنەوە.