لیژنەی دارایی پەرلەمانی عێراق و بانکی ناوەندی لەسەر سزادانی بانکەکان کۆدەبنەوە

ئاڤا نیوز

سبەی سێشەممە، لیژنەی دارایی پەرلەمان و بانکی ناوەندیی عێراق گفتوگۆ لەسەر کۆمەڵێک پرسی دارایی دەکەن، لە نێویشیاندا هەڕەشەکانی گەنجینەی ئەمریکا و قەدەغەکردنی فرۆشتنی دۆلار بە بانکەکانی عێراق.

وێنە گەورەکە: خەزێنەی ئەمریکا بەنیازە لە دوو ماوەی داهاتوودا سزای نوێ و تووند بەسەر کۆمەڵێک بانک و ژمارەیەک بەرپرس و کەسایەتی عێراقیدا بسەپێنێت و پارەکانیان بلۆک بکات، ئەمەش بە هۆکاری پاڵپشتیکردن و پارەدارکردنی تیرۆر و سپیکردنەوەی پارە و ناردنی پارە بۆ ئەو وڵاتانەی سزای ئەمریکایان لەسەرە، ئێران وەک نمونە، لەو چوارچێوەیەدا بانکی ناوەندی هەنگاوەکانی چڕکردووەتەوە و ڕێکارەکانی لەسەر بانکەکان توندتر کردووە، هەر چەند ڕۆژێک پێش ئێستاش ئیدارەی ترەمپ پێنج بانکی دیکەی سزا دا و دۆلاری لێ قەدەغە کردن.

لێدوانی فەرمی: د. خەلیل دۆسکی، ئەندامی لیژنەی دارایی پەرلەمانی عێراق بە ئاڤای گوت، "سبەی لیژنەی دارایی پەرلەمانی عێراق لەگەڵ بانکی ناوەندی کۆدەبێتەوە، تاوتوێی سزادانی بانکەکان، بەرزی و نزمی نرخی دینار بەرامبەر بە دۆلار دەکرێت."

لەلایەکی دیکەوە: باس لە پرۆسەی بەبانکیکردنی مووچەی مووچەخۆرانی هەرێمی کوردستان دەکرێت.