قوباد تاڵەبانی: لەگەڵ پارتی لەسەر هەندێك لە بابەتەكان رێككەوتووین

ئاڤا نیوز

قوباد تاڵەبانی، سەرۆكی شاندی دانوستانكاری یەكێتی لەبارەی پێکهێنانی حکومەت دەڵێت، لەگەڵ پارتی "لەسەر هەندێک بابەت ڕێککەوتووین و لەسەر هەندێک بابەتی تریش خەریکە ڕێکدەکەوین".

وێنە گەورەکە: هەردوو شاندی پارتی دیموکراتی کوردستان و یەکێتی نیشتمانی کوردستان لە گفتوگۆکانیان لەبارەی پێکهێنانی کابینەی دەیەمی حکومەتی هەرێمی کوردستان بەردەوامن و تا ئێستا چەندین کۆبوونەوەیان لەسەر ئاستی باڵا و لیژنە تەکنیکییەکان کردووە و لەسەر زۆر بابەتی سیاسی و ئیداری هاوڕا بوونە و گەیشتوونەتە ڕێککەوتن. قوباد تاڵەبانی لەوبارەیەوە دەڵێت، پرۆسەكە باش دەڕوات بەڕێوەو ئینشەڵا دەگەینە ئەنجام.

لێدوانی فەرمی: قوباد تاڵەبانی لە لێدوانێكی ڕۆژنامەوانیداڕایگەیاند:

- كۆبوونەوە و گفتوگۆكانی نێوان پارتی و یەكێتی بەردەوامن و هەنگاوی باش چوونەتە پێشەوە، چەندین كۆبوونەوە لە ئاستی جیاجیا كراوە.

- لەگەڵ پارتی لەسەر هەندێك لە بابەتەكان رێككەوتووین و خەریكین لەسەر هەندێك بابەتی تر ڕێكدەكەوین.

- هەندێك بابەتیش ماوە هێشتا رێكنەكەوتووین لەسەریان، بەڵام پرۆسەكە باش دەڕوات بەڕێوەو ئینشەڵا دەگەینە ئەنجام.

زانیاریی زیاتر: لەچەند ڕۆژی داهاتوو شاندی دانووستانکاری پارتی و یەکێتی، سێهەمین کۆبوونەوەی خۆیان بۆ گفتوگۆکانی پێکهێنانی حکومەت دەکەن و گفتوگۆ لەسەر ڕەشنووسی لیژنەی تەکنیکی هەردوولا و دابەشکردنی پۆستەکانی کابینەی دەیەم دەکەن.

ئەوەی پێویستە بیزانیت: كۆبوونەوەكانی داهاتووی شاندی پارتی و یەكێتی بۆ ئەوەیە، پۆستەكان بە چ شێوەیەك دابنرێن و پێكهاتە و لایەنەكانی دیکە چۆن بەشداریی حكومەت بكەن.