کۆمیسیۆن بۆ ئاڤا: هیچ داوایەکمان لەبارەی خۆتۆمارکردنی ڕەوتەکەی موقتەدا سەدر پێنەگەیشتووە

ئاڤا نیوز

کۆمیسیۆنی باڵای هەڵبژاردنەکانی عێراق ڕەتیدەکاتەوە هیچ داوایەکیان لەلایەن ڕەوتی نیشتمانی شیعە، بە سەرۆکایەتی موقتەدا سەدر  پێگەیشتبێت بۆ خۆتۆمارکردن بە مەبەستی بەشداریکردن لە هەڵبژاردنی داهاتوو.

 

وێنە گەورەکە: بڕیارە مانگی 10ی ئەمساڵ هەڵبژاردنی پەرلەمانی عێراق بکرێت، چاوەڕوان دەکرێت ڕکابەرییەکی تووند لە نێوان لایەنە سیاسییەکان هەبێت و گۆڕانکاریش لە نەخشەی سیاسیی ئێستای عێراق ڕووبدات.

 

چیرۆکی سەرەکی: چەند ڕۆژێکە بەگوێرەی چەند میدیایەکی عێراقی و عەرەبی، دەنگۆی ئەوە بڵاو دەکرێتەوە گوایە ڕەوتی نیشتمانیی شیعە، بە سەرۆکایەتی موقتەدا سەدر بە مەبەستی بەشداریکردن لە هەڵبژاردنی خولی شەشەمی پەرلەمانی عێراق لە کۆمیسیۆنی باڵای سەربەخۆی هەڵبژاردنەکان خۆی تۆمار کردووە.

 

لێدوانی فەرمی: جومانە غەلای، وتەبێژی کۆمیسیۆنی باڵای هەڵبژاردنەکان بە ئاڤا میدیای ڕاگەیاند: هیچ داوایەکمان لەلایەن ڕەوتی نیشتمانیی شیعە بۆخۆ تۆمارکردن بە مەبەستی بەشداریکردن لە هەڵبژاردنی داهاتووی ئەنجوومەنی نوێنەرانی عێراق پێنەگەیشتووە.

زانیاریی زیاتر: بەگوتەی جومانەی غەلای، تۆمارکردنی حیزبەکان لە کۆمیسیۆن بەردەوامە و نەوەستاوە، بەڵام لە سەروبەندی ئامادەکارییەکانی کۆمیسیۆن بۆ هەڵبژاردن، دەرگای خۆتۆمارکردن بۆ ئەو حیزب و قەوارانە دەکرێتەوە کە نیازی بەشداریکردنیان لە هەڵبژاردن هەیە.

 

ئەوەی پێویستە بیزانیت: ڕەوتی نیشتمانیی شیعە -پێشتر ڕەوتی سەدر بوو- لە هەڵبژاردنی پەرلەمانی عێراق لە ساڵی 2021 بەشداریی کرد و زۆرترین کورسی لەسەرتاسەری عێراق بەدەستهێنا(73 کورسی)، دواتر بەهۆی ناکۆکییەکانی لەگەڵ لایەنەکانی دیکەی شیعە لەسەر پێکهێنانی حکومەت، لە پەرلەمان و پرۆسەی سیاسی لە ساڵی 2022  کشایەوە.

 

ئەمەش بزانە: پێشتر جومانە غەلای، وتەبێژی کۆمیسیۆنی هەڵبژاردنەکان بە ئاڤا میدیای ڕاگەیاندبوو: وادەی هەڵبژاردن لەلایەن دیوانی سەرۆکایەتیی ئەنجوومەنی وەزیرانەوە بە هەماهەنگی لەگەڵ کۆمیسیۆنی هەڵبژاردنەکان دیاری دەکرێت، بە مەرجێک ئەم وادەیە پێش کۆتاییهاتنی خولی ئێستای پەرلەمان بێت بە ماوەی کەمتر لە 45 ڕۆژ لە یەکەم دانیشتنی پەرلەمانەوە کە لە 9-1-2022 بەڕێوەچوو.