ناوەندی نێودەوڵەتیی بۆ دارایی و بازرگانی لە سلێمانی دەکرێتەوە

ئاڤا نیوز

بڕیارە سبەی پێنجشەممە عەلی عەلاق، پارێزگاری بانکی ناوەندیی عێراق، سەردانی سلێمانی بکات و  ناوەندی نێودەوڵەتیی بۆ دارایی و بازرگانی لە سلێمانی بکاتەوە.

لێدوانی فەرمی: دکتۆر هەڤاڵ ئەبووبەکر، پارێزگاری سلێمانی، بە ئاڤا میدیای ڕاگەیاند:

- ڕۆژی 20-2-2025، بە ئامادەبوونی عەلی عەلاق لە سیتی سەنتەر شاری سلێمانی، ناوەندی نێودەوڵەتی بۆ دارایی و بازرگانی دەکرێتەوە.

- کردنەوەی ناوەندەکە یەکەمە لەسەر ئاستی هەرێمی کوردستان و عێراق کە زەمینەسازی دەکات بۆ کردنەوەی هەر لقێکی دیکەی بانک لە پارێزگای سلێمانی.

لەلایەکی دیکەوە: سەبارەت بە کردنەوەی لقی بانکەکانی ڕەشید و ڕافیدەین،  پارێزگاری سلێمانی، دەڵێت: ئاگاداری ئەوەنین کە لقی ئەو بانکانە سبەی لە پارێزگای سلێمانی بکرێنەوە، بەڵام لە ڕێگەی ئەم ناوەندە هەر بانکێک کە بە پێی ئەو مەرجانەی لەلایەن حکومەتی هەرێمی کوردستان و حکومەتی عێراق دانراوە، مافی ئەوەی هەیە لقی بکاتەوە، وەکو سەنتەرێکی نێودەوڵەتیی دەبێت هاوشێوەی ئەوەی لە دوبەی لە وڵاتی دیکە هەیە، کە دەتوانێت ناوەندە دارایی و بازرگانییەکان کۆبکاتەوە لە بابەتی بۆرسە و بانک و وەبەرهێنان و بانکە ئەهلی و حکومییەکان، دەکەوێتە سەر بڕیارەکانی خۆیان و ئەو ڕێکارانەی بۆ کردنەوەی لقی بانکی دەگیرێتەبەر، دەتوانێت ڕێگە بدات بە کردنەوەی لقی بانکەکان.