لە قەزای شێخان 50 هەزار کەس سەرەیان بۆ کارتی نیشتمانیی گرتووە

ئاڤا نیوز

 

لە فەرمانگەکانی قەزای شێخان بۆ دەرهێنانی کارتی نیشتمانی زیاتر لە 50 هەزار هاووڵاتیی سەرەیان گرتووە ئەمەش دوای بڕیارێکی بەغدا بۆ دەرهێنانی کارتی نیشتمانی لەلایەن هاووڵاتییانەوە.

وێنە گەورەکە: بەهۆی بڕیارێکی حکومەتی عێراق کە داوای کردووە، هەرکەسێک کارتی نیشتمانی نەبێت، مووچە و بەشەخۆراکی مانگانەی دەبڕدرێت، ئێستا بەوهۆیەوە 50 هەزار هاووڵاتی لە نووسینگە و فەرمانگە حکومییەکانی قەزای شێخان بۆ دەرهێنانی کارتی نیشتمانی سەرەیان گرتووە.

لێدوانی فەرمی: سەردار یەحیا، قایمەقامی قەزای شێخان لەبارەی دروستبوونی ئەو قەرەباڵغییە لە فەرمانگەکانی ناوچەکە بە ئاڤای گوت، فەرمانبەرمان کەمە، ئێمە دەیان جار داوامان لە بەغدا کردووە خەڵکمان بۆ دابمەزرێنێت بەڵام داواکەمان جێبەجێ ناکات.

 

زانیاریی زیاتر: سەردار یەحیا هۆکارێکی دیکەی قەرەباڵغییەکە بۆ کۆنی سیستمی فەرمانگەکە دەگێڕێتەوە. ئەو دەڵێت، داوامان لە بەغدا کردووە بۆمان بگۆڕێت، بەڵام ئەوەشمان بۆ ناکات.

 

کاریگەری و لێکەوتەکان: هاوکات هەر ئەمڕۆ لە شێخان، لەسەر دەرهێنانی کارتی نیشتمانی لە پێشمەرگەیەک دراوە، کۆڤان دەرمان جردۆ؛ قسەی بۆ ئاڤا کردووە و دەڵێ، "پێشمەرگەم، چووم بۆ دەرهێنانی کارتی نیشتمانی، داوای هاوکاریم لە بەڕێوەبەرایەتی فەرمانگەی کارتی نیشتمانی شێخان کرد خێرا ئیشەکەم بۆ بکەن چونکە دەوامم هەبوو". وەک پێشمەرگەکە دەڵێت، لە بری ئەوەی هاوکاری بکەن "بە بۆکس" لێیان داوە و برینداریان کردووە.

 

بۆچوونی لایەنی بەرامبەر: لەبارەی لێدان لەو پێشمەرگەیە، سەردار یەحیا، قایمقامی شێخان بە ئاڤای گوت، ئاگادارین کێشەیەک دروست بووە، بەڵام نەمانزانیوە پەلاماری هیچ پێشمەرگەیەک درابێت، بەدواداچوونی بۆ دەکەین.