فەرمانبەرانی گرێبەستی بەڕێوەبەرایەتیی مینی دهۆک داوا دەکەن بکرێنە هەمیشەیی

ئاڤا نیوز

 

143فەرمانبەری گرێبەستی بەڕێوەبەرایەتیی گشتیی مین لە پارێزگای دهۆك داوا دەکەن بکرێنە هەمیشەیی. وەکو خۆیان دەڵێن، کارەکەیان ترسناکە، بەڵام  لە هەموو شایستە و مووچە و پاداشتێکی حکومەتی هەرێمی کوردستانێ بێ بەش دەبن چونکە گرێبەستین.

لێدوانی فەرمی: شیلان سامر، بەڕێوبەری گشتی مین لە پارێزگای دهۆک بە ئاڤا میدیای ڕاگەیاند: زیاتر لە 20 ساڵە زۆرینەی فەرمانبەرانی ئێمە گرێبەستن و نەبوونەتە هەمیشەیی، هەركاتێك هەر فەرمانبەرێك لە ڕێگەی چوون بۆ جێبەجێكردنی ئەركێك تووشی ڕووداوی هاتووچۆ بێت یاخود لە كێڵگەیەكی مین بەهۆی تەقینەوەی مینێك بریندار بن یان بەشێكی جەستەیان لەدەست بدەن، هیچ مافێكیان لە مووچە و پاداشت و قەرەبووكردنەوە نابێت، چونكە گرێبەستن و هەمیشەیی نین.

 

زانیاریی زیاتر: شیلان سامر ئەوە بۆ ئاڤا ئاشکرا دەکات کە چەندین جار نووسراوی فەرمییان بۆ سەرووی خۆیان كە دەزگای مینە ناردووە و داوایان كردووە كارمەندەکانیان بكرێن بە هەمیشەیی بەڵام هیچ وەڵامێكی ئەرێنیان وەرنەگرتووە.

 

ئەوەی پێویستە بیزانیت: لە ساڵی 2005 تاوەکو ساڵی 2024، تەنیا لە دهۆک 14 کارمەندی مین لە كاتی جێبەجێكردنی ئەركەكەیان گیانیان لەدەست داوە و هەشت کارمەندی دیکەش برینداربوونە و ئێستا خاوەن پێداویستیی تایبەتن.