کۆڕەک لەبارەی سزادانی لەلایەن بەغدا ڕوونکردنەوە دەدات

ئاڤا نیوز

 

کۆمپانیای کۆڕەک تیلیکۆم، بڕیاری دەستەی ڕاگەیاندن و پەیوەندییەکان و وەزارەتی پەیوەندییەکانی عێراق بە پێشهاتێکی مەترسیدار دەبینێت و داوا دەکات دەستوەردانی خێرا بکرێت بۆ ڕاگرتنی ئەم ڕێکارە ناڕەوایە کە هەڕەشە لە داهاتووی پەیوەندییەکان لە عێراق دەکات.

 

وێنە گەورەکە: ڕۆژی سێشەممە 18-2-2025، دەستەی ڕاگەیاندن و پەیوەندییەکانی عێراق، داوای لە وەزارەتی پەیوەندییەکانی عێراق کرد دەستبەجێ خزمەتگوزاری ئینتەرنێت لەسەر کۆمپانیای کۆڕەک تیلیکۆم ببڕدرێت وەک ڕێکارێکی سزایی لە بەرامبەر کۆمپانیای ناوبراو بەهۆی نەدانی ئەو قەرزانەی کە لەسەری بووە و بەردەوامی سەرپێچیەکانی کە لەدژی تۆمارکراوە.

 

ڕاگەیێنراوی فەرمی: کۆمپانیای کۆڕەک تیلیکۆم لە ڕاگەیێنراوێکدا ئاماژە بۆ ئەوە دەکات، بڕینی ئینتەرنێت لەلایەن دەستەی ڕاگەیاندن و پەیوەندییەکان و وەزارەتی پەیوەندییەکان بە ڕاسپاردەی نووسینگەی سەرۆکوەزیرانی عێراق بەرامبەر بە ملیۆنان بەکارهێنەرانی تۆڕەکەمان، پێشهاتێکی مەترسیدارە کە عێراق پێشتر بەخۆیەوە نەبینیوە و پێشێلکردنێکی ئاشکرای یاسا و گرێبەستی مۆڵەتە.

 

-سەرەڕای ئەوەی کۆمپانیاکەمان لە کردەوە تیرۆریستیەکانی داعش زۆرترین زیانی بەرکەوت، بەڵام دەستەی ڕاگەیاندن و پەیوەندییەکان لەناکاو بڕیاری بڕینی خزمەتگوازری دا و دواتر وەزارەتی پەیوەندییەکان زیانەکانی زیاتر کرد بێ ڕەچاوکردنی مافی هاووڵاتیان بە تەواوی تۆڕەکەی پچڕاند.

 

-لە ماوەی ڕابردوودا کۆمپانیاکەمان ڕووبەڕووی هەڵمەتی چەواشەکاری میدیایی بووەتەوە بۆ ناوزڕاندن و تۆمەتبارکردنی بە نەدانی باج، لەکاتێکدا ئێمە لەسەر بنەمای ڕێککەوتن لەگەڵ لیژنەی پەلەمانی پەیوەندیدار پابەندبووین بە یاسا و ڕازی بووین بە چارەسەرکردنی دارایی کە هیچ بنەمایەکی یاسایی نییە.

 

- ئەم هەنگاوە کە گوشاری سیاسی پێوەدیارە و ئامانج دوورخستنەوەی کۆمپانیاکەمانە بە قازانجی لایەنێکی دیکە.

- یەکەمجارە ستەمێکی لەمجۆرە لە خزمەتگوزاریی هاووڵاتیان لە عێراق و لەسەرتاسەری جیهاندا ڕوودەدات.

- داوا لە سەرۆکی ئەنجوومەنی باڵای دادوەری و دەستەی دەستپاکی و ڕێکخراوەکانی مافی مرۆڤ و نەتەوەیەکگرتووەکان دەکەین دەستوەردانی خێرایان هەبێت بۆ ڕاگرتنی ئەم ڕێکارە ناڕەوایانە کە هەڕەشە لە داهاتووی پەیوەندییەکان لە عێراق دەکەن.