ئەمریكا خوازیاری پێكهێنانی كابینەی نوێی حكومەتی هەرێمی كوردستانە لەكاتێكی نزیكدا

ئاڤا نیوز

بەڕێوەبەری كارەكانی باڵیۆزخانەی ئەمریكا لە عێراق هیوای خواست، لایەنە براوەكانی هەڵبژاردنی پەرلەمانی كوردستان لەنزیكترین كاتدا بگەنە ڕێككەوتن بۆ پێكهێنانی كابینەی نوێی حكومەتی هەرێمی كوردستان.

وێنە گەورەكە: ئێواره‌ی ئه‌مڕۆ 19-2-2025، نێچيرڤان بارزانى، سه‌رۆكى هه‌رێمى كوردستان، پێشوازیی له‌ باڵيۆز دانيال ڕوبنستين كرد كه‌ كاره‌كانى باڵيۆزى ئه‌مريكا له‌ عێراق به‌ڕێوه‌ده‌بات.

ڕاگەیێنراوی فەرمی: بەپێی ڕاگەیێنراوی سەرۆكایەتی هەرێمی كوردستان، له‌ كۆبوونه‌وه‌كەدا، بره‌ودان به‌ په‌يوه‌ندييه‌كانى عێراق و هه‌رێمى كوردستان له‌گه‌ڵ ئه‌مريكا تاوتوێ كرا، هاوكات لەبارەی هه‌وڵ و ڕێكاره‌كانى ده‌ستپێكردنه‌وه‌ى هه‌نارده‌كردنى نه‌وتى هه‌رێمى كوردستان و هه‌نگاوه‌كانى پێكهێنانى حكوومه‌تى هه‌رێمى كوردستان، بيروڕايان گۆڕييه‌وه‌.

لەلایەكی دیكەوە: ڕوینستین كە ئێستا كارەكانی باڵیۆزی ئەمریكا لە عێراق بەڕێوەدەبات، هيوای خواست لايه‌نه‌ براوه‌كانى هه‌ڵبژاردنى په‌رله‌مانى كوردستان له‌ نزيكترين كاتدا بگه‌نه‌ ڕێككه‌وتنى پێكهێنانى كابينه‌ى نوێى حكوومه‌ت.

ئەوەش بزانە: له‌ ته‌وه‌رێكى ديكه‌ى كۆبوونه‌وه‌كه‌دا دۆخى سووريا و ڕه‌وشى كورد له‌و وڵاته، هه‌روه‌ها هه‌وڵه‌كانى پرۆسه‌ى ئاشتى له‌ توركيا‌ خرايه‌ به‌ر باس.