لەبارەی نەمانی خوێن لە بانکی خوێنی سلێمانی ڕوونکردنەوە دەدرێت

ئاڤا نیوز

دەنگۆیەک لەسەر نەمانی خوێن لە بانکی خوێنی سلێمانی بڵاوکرایەوە و ئاڤا میدیا ڕاستی بابەتەکە بۆ هاونیشتمان ئاشکرا دەکات.

وێنە گەورەکە: بۆ ئەوەی هەر کەسێک بتوانێت خوێن ببەخشێت، دەبێت لە بانکەکانی خوێن پشکنینەکانی ڤایرۆسات و پشکنینی CBC دیاریکردنی ڕێژەی خوێن، لەگەڵ پشکنینی گرووپی خوێن بکات، ئەوکات دەتوانێت خوێن ببەخشێت.

لێدوانی فەرمی: کۆچەر ئیبراهیم کەریم، بەڕێوەبەری بەڕێوەبەرایەتیی بانکی خوێنی سلێمانی بە ئاڤا میدیای ڕاگەیاند:

- پێداویستییەکانی تایبەت بە پشکنینی خوێن بۆ بەخشەرانی خوێن لە بەڕێوەبەرایەتییەکەمان نەمابوو، بۆیە مامەڵەکانی وەرگرتنی خوێنمان کەمکردەوە، تا ئەو کاتەی پێداویستییەکانمان بە دەست گەیشت.

- لە بانکی خوێنی سلێمانی خوێنی پێویست بۆ بەخشین بە هاونیشتمانیان و ئەو نەخۆشانە هەیە کە پێویستیانە.

زانیاریی زیاتر: بەڕێوەبەرایەتیی تەندروستیی سلێمانی پێداویستییەکانی بۆ بەڕێوەبەرایەتییەکە دابین کردووە، لە چەند ڕۆژی داهاتووشدا بەشێکی دیکەی پێداویستییەکانیان بۆ ڕەوانە دەکرێت.