باڵیۆزی یەکێتیی ئەوروپا داوا دەکات عێراق ببێتە ئەندام لە ڕێکخراوی بازرگانی جیهانی

ئاڤا نیوز

باڵیۆزی یەکێتیی ئەوروپا لە عێراق دەڵێت، پشتیوانی لە بە ئەندامبوونی عێراق لە ڕێکخراوی بازرگانی جیهانی و یەکخستنی یاساکانی وڵاتەکە لەگەڵ پێوەرە نێودەوڵەتییەکان دەکەن، داواش لە بەغدا دەکات هەنگاوی زیاتر بۆ گەشەپێدانی کەرتی تایبەت بنێت.

وێنە گەورەکە: ڕێکخراوی بازرگانی جیهانی ڕێکخراوێکی حکومی نێودەوڵەتییە بۆ بەهێزکردنی بازرگانی نێودەوڵەتیی و چارەسەری کێشەکان لەبارەی یاسا بازرگانییەکان، ئێستا 164 دەوڵەت لە ڕێکخراوەکەدا ئەندامن و بەرپرسیارن لە 98%ـی بازرگانی جیهانی.

لێدوانی فەرمی: تۆماس سەیلەر، باڵیۆزی یەکێتیی ئەوروپا لە عێراق بە ڕۆژنامەی سەباحی نیمچەی فەرمی ڕاگەیاندووە:

٠ پشتیوانیی لە چاکسازییە ئابوورییەکانی حکومەتی عێراق دەکەین.

٠ دیپلۆماسییەتی حکومەتی عێراق بۆ پاراستنی ئارامی ناوچەکە جێگەی پێزانینە و وایکردووە بەغدا وەک پردێک بۆ گفتوگۆ  سەیربکرێت.

٠ هانی حکومەت و پەرلەمان دەدەین گەشەی زیاتر بە کەرتی تایبەت بدەن، چونکە ئەوە دەبێتەهۆی ڕاکێشانی وەبەرهێنەر، بازرگان و کۆمپانیا پیشەسازییە ئەوروپییەکان تا بێن و لە عێراق وەبەرهێنان بکەن.

٠ ڕووبەڕووبوونەوەی گەندەڵی، چاودێری کۆمەڵایەتی، چاکسازیی لە کەرتە مەدەنیی و سەربازییەکان، چاکسازی لە کەرتی بانک و یاسای کۆمپانیاکان بناغەن بۆ ئابوورییەکی نوێ.

٠ پشتیوانی لە بە ئەندامبوونی عێراق لە ڕێکخراوی بازرگانی جیهانی (WTO) دەکەین و ئەوە هەنگاوێکی پێویستە، بۆ یەکخستنی یاساکانی عێراق لەگەڵ پێوەرە نێودەوڵەتییەکان.