پەیامێکی نوێ لە ئیدارەی ترەمپەوە بۆ سەرۆکوەزیرانی عێراق لە بارەی تسورکۆف

 

ئاڤا نیوز

نێردەی تایبەتی ترەمپ بۆ کاروباری بارمتەکان پەیامێکی نوێی سەبارەت بە ئەلیزابێس تسورکۆڤ ئەو لێکۆڵەرە ئیسرائیلی-ڕووسییەی لە عێراق ڕفێندرا، ئاراستەی سەرۆکوەزیرانی عێراق دەکات.

وێنە گەورەکە: ئیلیزابێس تسورکۆف کە هاوکات خاوەنی ڕەگەزنامەی ئیسرائیلی و رووسییە، قوتابی دکتۆرا و توێژەرێکی ئیسرائیلییە لە سیاسەتەکانی رۆژهەڵاتی ناوەڕاست و لە ساڵی 2023ـەوە لە عێراق شوێنبزرە.

بڵاوکراوەی فەرمی: ئادەم بۆلەر، نێردەی تایبەتی سەرۆکایەتی بۆ کاروباری بارمتەکان لە ئیدارەی دۆناڵد ترەمپ، سەرۆکی ئەمریکا، پەیامێکی نوێی لە تۆڕی ئێکس ئاراستەی محەممەد شیاع سوودانی، سەرۆکوەزیرانی عێراق دەکات و هاوکات گرتەیەکی ڤیدیۆیی تسورکۆڤی دووبارە بڵاوکردووەوتەوەو نووسیویەتی: "ئەمە چیرۆکی ئەلیزابێس تسورکۆڤە، سەرۆکوەزیرانی عێراق ئێستا چانسی ئەوەی هەیە کە نیشانی جیهان بدات کە ئایا دەبێت سەرۆکوەزیران بێت یان نا؟".

ئەوەی پێویستە بیزانیت: ئەمە یەکەمجار نییە کە ئەو نوێنەرەی سەرۆکی ئەمریکا باسی سوودانی بکات، سەرەتای ئەم مانگەش تۆمەتباری کردبوو بەوەی "بەڵێنی درۆینە"ی داوە سەبارەت بە ئازادکردنی ئیلیزابێس تسورکۆف. ئەوکات ڕایگەیاندبوو ئەگەر ئەو کچە ئازاد نەکرێت، "دەبێت سوودانی لە پۆستەکەی دووربخرێتەوە".

لەلایەکی دیکەوە: لەسەروبەندی گۆڕینەوەی دیل و بارمتەکان لەنێوان ئیسرائیل و حەماس، سەرەتای ئەم مانگە سەرچاوەیەک لە سەرکردایەتی بەرەی مقاوەمەی ئیسلامی لە عێراق بە میدیا عێراقییەکانی ڕاگەیاندبوو: پەیوەندییەکی ناڕاستەوخۆ لە نێوان مقاوەمەی عێراقی و ئیسرائیل لە ڕێگەی لایەنە ناوچەییە نێوەندەکانەوە هەبووە بە ئامانجی ڕێکەوتنێک بۆ ئازادکردنی زیندانیانی حیزبوڵڵا لە کاتی شەڕ لەگەڵ ئیسرائیل لە بەرامبەر ئازادکردنی ئیلیزابێس تسورکۆڤی ڕفێندراوی ئیسرائیلی.

ئەوەی لەوبارەیەوە دەگوترێت: 23ـی مانگی ڕابردوو، فوئاد حوسێن، وەزیری دەرەوەی عێراق ڕایگەیاندبوو، ئیلیزابێس تسورکۆڤ لە ژیاندا ماوە و لەلایەن گرووپە چەکدارەکانی عێراقەوە بە بارمتە گیراوە، سەرۆکوەزیرانی عێراقیش کار بۆ ئازادکردنی دەکات.