ئاڤا وردەکاری چارەسەری کێشەی جووتیارانی کەرکووک ئاشکرا دەکات

ئاڤا نیوز

لەسەر ڕێگریکردنی سوپا لە جووتیارانی سنووری شەناغە و کێشەی زەوییەکانی ئەو ناوچەیە، بریکاری وەزیری داد و نوێنەرانی وەزارەتە پەیوەندیدارەکان ڕۆژی سێشەممە لە بینایەی پارێزگای کەرکووک لەگەڵ جووتیارانی ناوچەکە کۆبوونەوە، لەسەر چەند بنەمایەک ڕێککەوتن لە ڕەزامەندی زارەکی سوودانیشی لەسەر دراوە.

چیرۆکی سەرەکی: ڕۆژی دووشەممە جووتیارانی گوندی شەناغە لە سنووری کەرکووک سەرقاڵی کێڵانی زەوییەکانیان بوون بەمەبەستی داچاندنی گەنم و جۆ، هەر زوو هێزێکی سوپای عێراق هەڵدەکوتێتە سەر ئەو جووتیارانە و دەیەوێت کارەکانیان پێ ڕابگرێت، بەهۆی ئەوەی سوپا توندوتیژی بەکارهێنا، هەر زوو دەنگدانەوەی فراوانی بەدوای خۆیدا هێنا.

وێنە گەورەکە: وەرزی داچاندنی گەنم بەرەو کۆتاییە، هەزاران جووتیار لە سنووری کەرکووک کە بژێوی ژیانیان لەسەر فرۆشتنی گەنمە بەهۆی ڕێگری سوپا و جێبەجێنەکردنی بڕیاری هەڵوەشاندنەوەی بڕیارەکانی مەجلیس قیادە سەورە، هێشتا نەیانتوانیوە زەوییەکانیان بە گەنم دابچێنن.

لێدوانی فەرمی: محەممەد ئەمین، نوێنەری جووتیارانی سەرگەڕان بەئاڤای گوت، "نزیکەی 29 هەزار دۆنم لەسنووری پێنج گوندی شەناغە بە گەنم دادەچێنرێت. سوودانی، سەرۆکوەزیرانی عێراق بەزارەکی ڕەزامەندی لەسەر دەربڕیوە تەنیا ماوەتەوە سەر ئەوەی بە فەرمی واژۆ لەسەر جێبەجێکردنی ئەو بڕیارانە بکات"

گوتیشی، " تەنیا 910 دۆنم زەوی کاری لەسەر ناکەین، چونکە داگیرکراوە و عەرەبەکان پێشووتر بە پشتئەستوور بە بڕیارەکانی بەعس لە دادگە سکاڵایان کرد، بەڵام ئێمە ڕادەستمان نەکردوون، بۆیە تاوەکو هەڵوەشاندنەوەی بڕیارەکانی مەجلیس قیادە سەورە جێبەجێ دەکرێت ئێمە و ئەوانیش کار لەسەر ئەو ڕووبەر زەوییە ناکەین."

لە لایەکی دیکەوە: یەکێک لە بڕیارەکان کە سوودانی واژۆی لەسەر دەکات، سەندنەوەی مەلەفی ئەمنییە لە سوپاوە بۆ وەزارەتی ناوخۆی عێراق.