هەرێمی كوردستان لە پرسی ئاسایشی خۆراك هەماهەنگی لەگەڵ عێراق دەكات

ئاڤا نیوز

شاندێكی حكومەتی هەرێمی كوردستان بۆ گفتوگۆكردن لەسەر ڕەشنووسی نیشتمانیی ئاسایشی خۆراك، سەردانی بەغدا دەكات، لەپێناو كاری پێكەوەیی هەردوو حكومەتی هەرێمی كوردستان و فیدڕاڵی بۆ مسۆگەركردنی ئاسایشی خۆراك.

وێنە گەورەكە: ئەمڕۆ لە شاری بەغدا، كۆبوونەوەی لیژنەی نیشتمانیی ئاسایشی خۆراك بۆ گفتوگۆكردن لەسەر ڕەشنووسی نیشتمانیی ئاسایشی خۆراك بەڕێوەچوو، شاندی هەردوو وەزارەتی كشتوكاڵی هەرێمی كوردستان و عێراق بە مەبەستی تەواوكردنی تێبینییەكانی ڕەشنووسی ستراتیژیی ئاسایشی خۆراک بەشداری كۆبوونەوەكەیان كرد.

 

ڕاگەیێنراوی فەرمی: وەزارەتی كشتوكاڵ و سەرچاوەكانی ئاوی هەرێمی كوردستان لە ڕاگەیێنراوێكدا ئاماژەی بەوەكرد، ڕاوێژكار شەیما جەمال كوێخا، وەك نوێنەری وەزارەتی كشتوكاڵی هەرێمی كوردستان بەشداری كۆبوونەوەكەی كردووە و بەپێی ڕاگەیێنراوەكە حكومەتی فیدڕاڵی مەبەستیەتی سوود لە ئەزموونی هەرێمی كوردستان ببینێت لەڕووی ئاسایشی خۆراك.

 

بابەتە ستراتیژییەكە: لەچوارچێوەی پلانی گەشەپێدانی نیشتمانی كە لەلایەن وەزارەتی پلاندانانی عێراقەوە داڕێژراوە، عێراق مەبەستیەتی كار بۆ دابینكردنی ئاسایشی خۆراك بكات بۆ ئەمەش سوود لە ئەزموونی هەرێمی كوردستانیش وەربگرێت، بەو پێیەی حكومەتی هەرێمی كوردستان لە سەردەمی كابینەی نۆیەم بایەخێكی تایبەتی بە فرەچەشنكردنی سەرچاوەی داهات و پشتبەستن بە خۆبژێوی داوە، لەڕێگەی گرنگیدان بە سێكتەرەكانی كشتوكاڵ و پیشەسازی و كەرتی وزە.

 

زانیاریی زیاتر: ھەر لە كۆبوونەوەكە بڕیار درا لیژنەی جێبەجێكار دروستبكرێت لە نوێنەرانی سەرجەم ئەو وەزارەت و دەستانەی كە جێبەجێكردنی ستراتیژییەكە دەكەوێتە ئەستۆیان و ئاسایشی خۆراك لە پێشینەی كارەكانیانە.