پەكەكە: ئێمە هۆكاری دواخستنی بڵاوكردنەوەی پەیامەكەی ئۆجەلان نین

ئاڤا نیوز

سەركردەیەكی پارتی كرێكارانی كوردستان، پەكەكە سەرسوڕمانیی خۆی لە دواكەوتنی بڵاوبوونەوەی پەیامەكەی عەبدوڵڵا ئۆجەلان دەردەبڕێت و دەڵێت ئێمە هۆكار نین.

بۆچی گرنگە: شاندی ئیمرالی لەسەردانی بۆ لای سەرجەم لایەنەکان لە تورکیا و هەرێمی کوردستان بەردەوامە، چاوەڕوان دەکرێت ئۆجەلان پەیامێکی مێژووی بڵاوبکاتەوە کە کاریگەری ڕاستەوخۆی لەسەر پڕۆسەی ئاشتی هەبێت لە تورکیا.

لێدوانی فەرمی: دوران كاڵكان، ئەندامی كۆمیتەی بەڕێوەبەریی پەكەكە بە میدیای حیزبەكەی ڕاگەیاند: هەرچەندە دەگوترا 15ـی ئەم مانگە پەیامەكەی عەبدوڵڵا ئۆجەلان بڵاودەبێتەوە، بەڵام ئەو وادەیە تێپەڕی و بڵاونەبووەوە ئەمە بۆ ئێمەش جێگەی پرسیارە بەڵام ئێمە وەکو پەكەكە هۆكار نین بۆ دواخستنی پەیامەكە و هیچ ئاستەنگێمان دروست نەكردووە.

لەلایەكی دیكەوە:  ئایشەگول دۆغان، گوتەبێژی دەم پارتی لە کۆنگرەیەکی ڕۆژنامەوانیدا گوتی: چەند ڕۆژێکە پرسیار لە بارەی نامەکەی ئۆجەلان دەکرێت، بەڵێ ئۆجەلان نامەی بۆ پەکەکە لە قەندیل، بۆ یەپەگە، هەسەدە لە ڕۆژئاوای کوردستان و بۆ درێژکراوەکانی پەکەکە لە ئەوروپا ناردووە، بە پێویستمان زانی خەڵکی لەوە ئاگادار بکەینەوە.