ساڵی ڕابردوو حکومەتی ئێران سزای زیندانی بەسەر حەوت مامۆستای زمانی کوردی سەپاندووە

ئاڤا نیوز

ئامارەکانی ڕێکخراوی مافی مرۆڤی هەنگاو دەریدەخات، لە ساڵی 2024ـدا حەوت مامۆستای زمانی کوردی لە شارەکانی ڕۆژهەڵاتی کوردستان سزای بەندکردنیان بەسەردا سەپێنراوە.

وێنە گەورەکە: 21ـی شوباتی هەموو ساڵێک وەک ڕۆژی زمانی دایک لە جیهان دیاریکراوە. کورد لە تورکیا و ئێران خوێندن بە زمانی دایکی لێ قەدەغە کراوە، بەو هۆیەوە ساڵانە چەندین کەس بەهۆی کردنەوەی قوتابخانەی تایبەتی بۆ فێربوونی زمانی کوردی لەلایەن حکومەتی ئێرانەوە زیندانی دەکرێن.

ڕاگەیێنراوی فەرمی: ڕێکخراوی مافی مرۆڤی هەنگاو ڕایگەیاندووە، لە ساڵی 2024، لەلایەن دەزگا ئەمنییەکانی ئێرانەوە حەوت مامۆستا و خۆبەخشی زمانی کوردی دەستگیرکراون و سزای زیندانیان بۆ بڕاوەتەوە. هاوکات هەشت مامۆستای دیکەش دەستبەسەرکراون.

ئەمانە ناوی مامۆستاکانن لەگەڵ سزای زیندانیەکانیان.

٠ سۆما پوور محەممەدی، خەڵکی سنە، لە لقی یەکی دادگای شۆڕشی سنە سزای 10 ساڵ بەندکردانی بەسەردا سەپێندرا.

٠ سووسەن حەسەنزاده، خەڵکی بۆکان، لە لقی 102ـی دادگای تاوانەکانی بۆکان سزای سێ مانگ بەندکرانی بەسەردا سەپێندرا.

٠ ئازاد عەباسی، خەڵکی دێولان، لە لقی 102ـی دادگای تاوانەکانی دێولان سزای سێ ساڵ بەندکرانی بەسەردا سەپێندرا.

٠ حاجی بەرزه، خەڵکی پیرانشار، لە لایەن لقی 102ـی دادگای تاوانەکانی پیرانشار سزای پێنج مانگ بەندکرانی بەسەردا سەپێندرا.

٠ ئیدریس مینبەری، خەڵکی سنە، لە لقی یەکی دادگای شۆڕشی سنە سزای یەک ساڵ بەندکران و یەک ساڵ بەندکردنی هەڵپەسێردراوی بەسەردا سەپێندرا.

٠ سروه پوورمحەممەدی، خەڵکی سنە، لە دادگای پێداچوونەوەی پارێزگای سنە سزای پێنج ساڵ بەندکردنی بەسەردا سەپێندرا.

٠ موژگان کاووسی، خەڵكی کەلاردەشت، لە لایەن لقی دووی دادگای شۆڕشی ساری سزای یەک ساڵ بەندکردنی بەسەردا سەپێندرا.